Uyu mwanzuro wafashwe nyuma y’uko abategura iri rushanwa batazi igihe amabwiriza ahagarika amarushanwa y’ubwiza mu Rwanda amaze imyaka ibiri ashyizweho azasubirirwamo.
Umwe mu bari mu itsinda ritegura irushanwa rya ‘Miss Africa Sub-Sahara’ yabwiye ikinyamakuru IGIHE ko bamaze igihe kinini bategereje ko aya marushanwa y’ubwiza yasubukurwa mu Rwanda none amaso akaba yaraheze mu kirere.
Aho yagize ati: “Ubundi iri rushanwa ryateganyaga ko ryatangira kuba mu 2022 ariko dushaka ko ribera mu Rwanda akaba ari nacyo gihugu kizajya kiryakira buri mwaka, kuko abaritegura bashakaga ko u Rwanda rugira umwihariko w’irushanwa rikomeye mpuzamahanga ry’ubwiza. Uwo mwaka dutegereza ko bakomorera amarushanwa y’ubwiza turaheba. Twafunze umwuka turihangana ariko ubu turi gutekereza ko twashaka ikindi gihugu ryaberamo muri Afurika.”
Ku wa 9 Gicurasi 2022, nyuma yaho havugwaga urunturuntu muri Miss Rwanda bikanarangira iri rushanwa rihagaritswe, ndetse n’andi marushanwa atandukanye, abayateguraga babwiwe ko bagiye guhabwa amabwiriza ngenderwaho bigakorwa n’Inteko y’Umuco ariko kugeza ubu amaso yaheze mu kirere.
