Ibyo atakoreye i Rwanda ari kubikorera imahanga! Rutahizamu w’Amavubi Gitego Arthur ijoro ryashize yabaye umwarimu muri Kenya.

Mu bihugu bitandukanye, imikino ya shampiyona yarakinwe n’andi marushanwa arakomeza, ndetse ahenshi umwaka w’imikino uri kugana ku musozo. 

Dukurikire ku Mbugazacu zitandukanye arizo:

• Injira muri WhatsApp Group yacu
• Dukurikire kuri WhatsApp Channel
• Dukurikire kuri Facebook Page
• Dukurikire kuri Twitter

Uko ni na ko bimeze kuri bamwe mu bakinnyi b’Abanyarwanda bakina mu bihugu byo hanze, aho bafashije amakipe yabo nubwo hari abo shampiyona zabo zitahiriye muri iyi minsi. 

Mu mukino wakinwe ku Gatandatu, tariki ya 27 Mata 2024, Imanishimwe Emmanuel ‘Mangwende’, yongeye guhabwa amahirwe abanza mu kibuga, gusa ikipe ye ntiyahirwa kuko yatsinzwe na Hassania d’Agadir ibitego 2-1. 

Ibi bitego byatesheje amanota atatu iyi kipe iyoboye Shampiyona binatuma isatirwa na Raja Club Athletic irusha amanota ane. 

Muri izi mpera z’icyumweru muri Kenya hakinwaga imikino y’irushanwa rya Mozzart Bet Cup aho rutahizamu w’Amavubi, Gitego Arthur, yafashije AFC Leopards gutsinda Campel FC ibitego 3-1. 

Gitego yabanje mu kibuga atsinda n’ibitego bibiri, akazi ke akarangije ahabwa amahirwe yo kuruhuka ku munota wa gatatu w’inyongera kuri 90 y’umukino, asimbuwe na Yakhama Brian. 

Bayisenge Emery na Sibomana Patrick bari mu Ikipe ya Gor Mahia yatowe nk’inziza y’icyumweru gishize nubwo batigeze bagaragara mu mukino iheruka gukina. 

Ku wa Gatandatu, mu Bubiligi hakinwe imikino ya Shampiyona, St. Liège ikinamo Hakim Sahabo inganya na Sint-Truidense VV igitego 1-1. Iyi ni inshuro ya gatanu yikurikiranya iyi kipe inganya. 

Uyu munyarwanda ukina hagati mu kibuga yahawe amahirwe n’umutoza we, Ivan Leko, abanza mu kibuga ndetse akina umukino wose. 

Ni mu gihe umunyezamu Maxime Wenssens ukinira Royale Union SG atigeze agaragara mu bakinnyi bifashishijwe mu mukino ikipe ye yatsinzemo Royal Antwerp FC ibitego 4-1. 

Rwatubyaye Abdul wa KF Shkupi yo muri Macedonia, yakinnye iminota yose y’umukino ikipe ye yatsinzemo GFK Tikvesh ibitego 3-0 ihita isanga FC Struga ku mwanya wa mbere muri Shampiyona yo muri iki gihugu. Zombi zinganya amanota 58 n’ibitego 12 zizigamye. 

Byiringiro Lague na mugenzi we Mukunzi Yannick bakinira Sandvikens IF yo muri Suède babanje hanze ku mukino ikipe yabo yanganyijemo na Gefle IF ibitego 2-2. Mukunzi ni we wagaragaye muri uyu mukino agiyemo ku munota wa 76. 

Ni mu gihe York Rafael wa Gefle IF ari we Munyarwanda witwaye neza muri uyu mukino kuko yabanje mu kibuga. 

FC Jerv ikinamo Mutsinzi Ange iri gukina mu Cyiciro cya Kabiri muri Norvége, yatsinze Sotra ibitego 2-0 mu mukino w’umunsi wa kane wa shampiyona ndetse ihita inayobora urutonde rw’agateganyo. Uyu myugariro yabanje mu kibuga ndetse anakina iminota yose. 

Rutahizamu Nshuti Innocent ukina muri Leta Zunze Ubumwe za Amerika yafatanyije n’ikipe ye ya One Knoxville gukina umukino wa mbere mu mateka mu irushanwa rya USL Jägermeister Cup ndetse inatsinda Chattanooga Red Wolves SC igitego 1-0. 

Impera z’icyumweru zasize FC Kryvbas Kryvyi Rih yo muri Ukraine ikinamo Kapiteni w’u Rwanda, Bizimana Djihad, ibonye amanota atatu yakuye kuri Metalist 1925 iyitsinze ibitego 3-0. 

Bizimana yongeye kubanza mu kibuga ndetse akina iminota yose y’umukino afasha ikipe ye gukomeza guhangana n’amakipe ayiri imbere ku rutonde rusange ari yo Shakhtar Donetsk ya mbere na Dynamo Kyiv ya kabiri. 

Al Ahli Tripoli yo muri Libya ikinamo Manzi Thierry ifite umukino wa Shampiyona igeze ku munsi wayo wa 17, izahura na Al Khums SC ku wa 30 Mata 2024. 

https://twitter.com/i/status/1784567282439536949