Ishyirahamwe ry’Umukino wa Basketball muri Afurika ryatangaje u Rwanda nk’igihugu kizakira imikino y’amajonjora y’Igikombe cya Afurika cy’Abatarengeje imyaka 16 mu Karere k’Iburasirazuba “U-16 Zone V African Basketball Championship Qualifiers”.
Iyi mikino izakinwa mu byiciro byombi; abahungu n’abakobwa, iteganyijwe tariki 27-30 Kamena 2023 aho izitabirwa n’ibihugu nk’u Rwanda, u Burundi, Uganda, Kenya, Tanzania, Misiri, Sudani y’Epfo, Djibouti, Somalia na Ethiopia.
Amakipe atandatu muri aya aziyongera kuri Algérie, Angola, Misiri, Uganda na Tunisia mu mikino y’Igikombe cya Afurika izabera muri Tunisia tariki 13-22 Nyakanga 2023.
Ikipe zizegukana iri rushanwa zizabona itike y’Igikombe cy’Isi ‘FIBA U17 Basketball World Cup’ mu 2024 mu bahungu n’abakobwa. Mu rwego rwo kwitegura neza iyi mikino, mu mpera z’ukwezi, Ishyirahamwe rya Basketball mu Rwanda ryakoresheje ingando zo gutegura abana bazatoranywamo abazitabira irushanwa.
