Nyuma y’intsinzi ya Mukura Victory Sports kuri Rayon Sports mu mukino w’umunsi wa 22 wa shampiyona, Munyakazi Sadate wahoze ayobora iyi kipe yambara ubururu n’umweru yateye akababaro abafana ba Mukura, abibutsa ko batazayisazira.
Ku wa Gatandatu ushize, Mukura VS yatsinze Rayon Sports igitego 1-0 mu mukino wabereye kuri Stade Amahoro i Remera.
Igitego rukumbi cyatsinzwe n’Umunya-Nigeria Ayilara Samson ku munota wa 76, cyashimangiye akaga ku ikipe ya Rayon Sports, kuko cyatumye amahirwe yayo yo kwegukana igikombe cya shampiyona agabanuka.
Byatumye Rayon Sports isigara irushwa inota rimwe na APR FC, nyuma y’uko iyi kipe y’ingabo yatsinze Vision FC 2-1 ku Cyumweru.
Mu gihe abafana ba Rayon Sports bakomeje kugira agahinda, ab’iya Mukura VS bo baracyari mu byishimo. Muri bo harimo Minisitiri w’Ububanyi n’Amahanga, Amb. Olivier Nduhungirehe, uzwi nk’umukunzi ukomeye wa Mukura.
Nyuma y’uyu mukino, yagaragaje ibyishimo bye ku rubuga rwa X, aho yashimiye cyane abafana ba Mukura VS b’i Save mu Karere ka Gisagara, yemeza ko bari bigaruriye Stade Amahoro.
Nyamara Munyakazi Sadate ntiyishimiye uko abafana ba Mukura bakomeje kwishimira iyi ntsinzi. Yabateguje ko igihe kizagera bakazicuza.
Yagize ati: “Mukura Victory Sports et Loisirs nimwishime sha! Umunsi nzagaruka ayo musekesha muzayaririsha. Nibuka ko nkiri Perezida wa Rayon Sports iyi Mukura nayinyabitse ibitego 5 kuri PELE STADIUM izuba riva.”
Sadate yikomye by’umwihariko Minisitiri Nduhungirehe n’abandi bafana ba Mukura barimo Ndayisaba Fidèle na Abraham, abibutsa ko umwaka utaha bagomba kwitegura guhangana n’imvura y’ibitego.
Ati: “Olivier Nduhungirehe, Ndayisaba Fidèle, Abraham n’abandi, umwaka utaha muzarira muhogore mwishwe n’agahinda k’imvura y’ibitego.”
Yakomeje ashimangira ko Rayon Sports yatanze amatama abiri, ariko Mukura VS nayo ikayakubita ititangiriye itama, ibintu afata nk’agasuzuguro.
Nubwo ibyo yavuze byakiriwe mu buryo butandukanye, ntihashidikanywa ko umwaka utaha w’imikino ushobora kuzazana ubundi bushyamirane hagati y’izi kipe zombi.
