Ikipe ya APR FC ikomeje gushaka ibisubizo by’ukuntu yazitwara neza mu mikino ya CAF Champions League iteganyijwe mu mwaka utaha w’imikino, ni muri urwo rwego rero ikaba igiye gusinyisha abanyamahanga bakora itandukaniro mu kibuga.
Ku ikubitiro hari amakuru yemeza ko iyi kipe ibiganiro ibigeze kure n’umukinnyi ukomoka muri Ghana witwa Bernard Morrison, akinira ikipe ya FAR Rabat yo muri Maroc iherutse guzerererwa na USM Alger muri 1/4 cya CAF Confederation Cup 2023-2024.
Rutahizamu Bernard Morrison akaba arasoza amasezerano ye muri FAR Rabat, tariki ya 30 Kamena 2024 bikavugwa ko ashobora kwerekeza muri Nyamukandagiramukibuga.
Amakuru ava mu bari hafi y’uyu mukinnyi yemeza ko nta gihindutse araza muri APR FC mu mwaka utaha. Morrison yanyuze mu makipe nka Simba SC, AS Vita Club, Yanga SC yanakiniye Orlando Pirates yo muri Afurika y’Epfo.
