Mu gihe Bishop Gafaranga, izina rizwi cyane mu itorero n’imyidagaduro ya Gikristo mu Rwanda, akomeje gufungwa by’agateganyo akurikiranyweho icyaha cy’ihohotera rishingiye ku gitsina, umugore we Annet Murava arakomeza kugaragaza ko amuri hafi ndetse atamutereranye.
Mu butumwa bushya yashyize kuri Instagram mu gitondo cyo kuri uyu wa Gatanu, Annet Murava yagaragaje ifoto ya Bishop Gafaranga ashyiraho amagambo agira ati: “Amasengesho yanjye, umutima n’ibitekerezo byanjye biri kumwe nawe.”
Iri jambo rinajyanye n’imbamutima, risobanura urukundo n’akanyamuneza agaragaza ko akigirira umugabo we n’ubwo ahanganye n’ibirego bikomeye.
Ubu ni rimwe mu butumwa butandukanye amaze iminsi atanga ku mbuga nkoranyambaga, aho agaragaza ko ari inyuma y’umugabo we ndetse amwifuriza gukomera muri ibi bihe.
Mu ijoro ryabanje, Annet yari yashyizeho indi foto bari kumwe, agira ati: “Imana iri muri ibi byose.”
Ni amagambo yavugishije benshi, bamwe babifata nk’ukwemera gukomeye, abandi babibona nk’ukwirengagiza uburemere bw’ibirego bihangayikishije.
Hari hashize iminsi itatu Annet Murava agaragaje urundi rukundo rutajegajega, ubwo yandikaga andi magambo yuje amarangamutima agaragaza ko akunda umugabo we “nubwo akurikiranyweho icyaha kiremereye.”
Urukiko rw’Ibanze rwa Nyamata ruherutse gutegeka ko Bishop Gafaranga afungwa by’agateganyo iminsi 30, mu gihe iperereza rikomeje ku byaha akekwaho, birimo ihohotera rishingiye ku gitsina bivugwa ko yakoreye umuntu umwe.
Ibi byose byabaye mu gihe sosiyete nyarwanda ikomeje gushishikarizwa kurwanya ihohotera rishingiye ku gitsina no gushyigikira uburenganzira bw’abahohotewe.
Ubutumwa bwa Annet Murava rero, buteye impaka hagati y’abashima ko ari umugore wiyemeje gukomeza kuba hafi y’uwo bashakanye, n’ababona ko akwiye kugendera kure umuntu uregwa icyaha cyiremereye nk’iki, by’umwihariko mu gihe ubutabera butaratanga umwanzuro.
Biteganyijwe ko dosiye ya Bishop Gafaranga izakomeza gukurikiranwa mu gihe afungiwe by’agateganyo, mu rwego rwo guha inzego z’ubutabera umwanya wo gukora iperereza ryimbitse.
