Urukiko Rukuru rwa Afurika y’Epfo rwakatiye Kelly Smith igifungo cya burundu nyuma yo guhamwa n’icyaha cyo gucuruza umwana we w’imyaka 6, Joshlin Smith, mu rubanza rwagize ingaruka zikomeye ku baturage kuva ubwo uwo mwana yaburaga mu mwaka ushize.
Kelly Smith, hamwe n’umukunzi we Jacquen Appollis na Steveno Van Rhyn, bahamwe n’icyaha cyo gushimuta no kugurisha umwana.
Nk’uko abatangabuhamya babivuze mu rukiko, Smith yemeye ko yahaye umwana we umupfumu (uzwi nka sangoma) amugurishije amafaranga angana na 20,000 rand (arenga miliyoni 1.5 Frw), kubera ko yavugaga ko umwana ashobora gukoreshwa mu myizerere ishingiye ku mbaraga zidasanzwe kubera “amaso n’uruhu rwe.”
Nubwo hashize igihe kinini ibikorwa byo kumushakisha bikomeje, iperereza rya polisi ntiryigeze ribona aho Joshlin yaba aherereye.
Mu gusoma umwanzuro w’urubanza ku wa Kane, umucamanza Nathan Erasmus yavuze ko kuba abaregwa bari basanzwe banywa ibiyobyabwenge bitagomba kuba impamvu yabagabanyiriza ibihano.
Bose bahamijwe icyaha cyo gushimuta, bahabwa igihano cy’imyaka 10 y’igifungo, ariko Smith yahanishijwe igihano cya burundu kubera icyaha cyo gucuruza umwana.
Iki kibazo cyongeye kugaragaza uburemere bw’ikibazo cy’icuruzwa ry’abantu muri Afurika y’Epfo, cyane cyane mu miryango yibasiwe n’ubukene n’ibiyobyabwenge, bikaba bisaba ko leta n’abaturage bose bahaguruka bagakumira ihohoterwa rikorerwa abana.
Kugeza ubu, ntiharamenyekana aho Joshlin Smith yaba aherereye.
