Kuri uyu wa 19 Mutarama 2024, padiri Prof.Dr.Fidèle Dushimimana, Umuyobozi wa Kaminuza Gatolika ya Kabgayi(ICK) ari kumwe n’abayobozi ba Kaminuza Gatolika bari mu nama y’Ihuriro Mpuzamahanga rya Kaminuza Gatolika bakiriwe na Papa Fransisiko.
Padiri Prof.Dr Fidele Dushimimana ari I Vatikani mu rwego rwo kwitabira inama y’Ihuriro Mpuzamahanga rya za Kaminuza Gatolika.
Iyi nama yatangiye kuwa 18 Mutarama 2024, yari igamije guhimbaza isabukuru y’imyaka 100 iri huriro rimaze no kurebera hamwe icyerekezo cya Kaminuza Gatolika n’uruhare rwazo muri Kiliziya mu myaka iri imbere.
Kuri gahunda y’iyi nama, abayobozi ba Kaminuza Gatolika n’abagize Ihuriro mpuzamahanga rya kaminuza bagera kuri 200, bakiriwe na Papa Fransisiko, kuri uyu wa 19 Mutarama 2024.
Mu butumwa yabagejejeho Papa Fransisiko yagarutse ku mateka y’Ihuriro Mpuzamahanga rya Kaminuza Gatolika, n’akamaro ryagize muri Kiliziya mu myaka 100 rimaze.
Mu byo iri huriro ryagezeho, byagaragajwe na Papa Fransisiko, harimo guteza imbere ubufatanye, no gufasha Kaminuza Gatolika kugira uruhare mu kubaka umuco w’urukundo, amahoro n’ubwiyunge mu bantu.
Kaminuza Gatolika ya Kabgayi ni umunyamurya w’Ihuriro rya Kaminuza Gatolika ku Isi. Kugera ubu iri huriro rikaba ryarateye inkunga imishinga itandukanye y’ubushakashatsi ikorwa n’iyi kaminuza.
