Sindayiheba Phanuel, umwe mu banyeshuri b’i Nyange bashyizwe mu Ntwari z’u Rwanda, yatorewe kuyobora Akarere ka Rusizi ko mu Ntara y’Iburengerazuba.
Sindayiheba yatorewe uyu mwanya mu matora yo kuzuza abagize inama njyanama y’akarere ka Rusizi yabaye ku wa Gatanu.
Ni amatora yagaragayemo guhangana gukomeye, aho yatsinze Mugorenejo Béatha ku majwi 299 kuri 30.
Uyu muyobozi mushya wa Rusizi ni umwe mu ntwari z’u Rwanda zibarizwa mu cyiciro cy’Imena.
Azwi cyane mu mateka y’ubutwari bw’abanyeshuri b’i Nyange, aho we na bagenzi be banze kwitandukanya ubwo abacengezi babasabye kwivangura hagendewe ku moko.
Ku wa 18 Werurwe 1997, ubwo yari umunyeshuri mu mwaka wa gatandatu w’amashuri yisumbuye ku Ishuri Ryisumbuye ry’i Nyange, abarwanyi b’abacengezi bagabye igitero kuri iri shuri.
Nyuma yo gusaba abanyeshuri kwitandukanya hagendewe ku moko, abanyeshuri barabyanga, bahitamo kuba umwe nk’Abanyarwanda.
Ibi byarakaje aba barwanyi maze batangira kubarasa no kubateramo za gerenade, aho abanyeshuri batandatu bahasize ubuzima abandi benshi barakomereka. Iki gikorwa cy’ubutwari cyabaye urugero rw’ubumwe n’ubutwari bukomeye bw’urubyiruko rw’u Rwanda.
Sindayiheba yagaragaje ko guhitamo ubunyarwanda kuruta amacakubiri byamubereye isomo rikomeye mu buzima bwe, akaba ari umwe mu barokotse icyo gitero.
Nyuma y’ibyo bihe bikomeye, yagiye akomeza kugaragara mu bikorwa bitandukanye byo kwigisha urubyiruko indangagaciro z’igihugu no gukomeza kubaka ubumwe bw’Abanyarwanda.
Kuba yatorewe kuyobora Akarere ka Rusizi ni ikimenyetso cy’icyizere abaturage n’ubuyobozi bwamugiriye, bagendeye ku mateka ye, ubunyangamugayo bwe, n’ubushobozi afite mu miyoborere.
Rusizi ni akarere gafite umwihariko w’ubukungu bushingiye ku buhinzi, uburobyi, n’ubucuruzi bukorerwa ku mupaka uhuza u Rwanda n’ibihugu bituranyi. Ubuyobozi bushya burasabwa gukomeza gukemura ibibazo by’abaturage no guteza imbere iterambere rirambye.
Sindayiheba asimbuye Kibiriga Anicet, wari umaze iminsi mike yeguye ku mwanya wa Meya wa Rusizi mu Ugushyingo 2024.
Binyuze mu nshingano nshya yahawe, hitezwe ko azakomeza gukorera abaturage, akabagezaho serivisi nziza kandi akabafasha kugera ku iterambere rirambye, nk’uko yabitangiye akiri umunyeshuri ubwo yaharaniraga ubumwe bw’Abanyarwanda.
Ubuyobozi bwe bwitezweho byinshi, birimo guteza imbere ubukungu bw’akarere, kunoza serivisi zitangirwa abaturage, gukomeza guteza imbere ubumwe n’ubwiyunge, no gukomeza guteza imbere gahunda za Leta zigamije imibereho myiza y’abaturage.
Mu mateka y’u Rwanda, Sindayiheba Phanuel akomeza kuba urugero rwiza rw’ubutwari n’ubumwe, ndetse ibikorwa bye bikaba bikomeje gutanga icyizere ku rubyiruko n’abandi Banyarwanda bose.
