Umutwe wa M23 watangaje ko hari abarwanyi bawo baheruka kugwa mu mirwano n’Ingabo za Repubulika Iharanira Demokarasi ya Congo; gusa uvuga ko batagera muri 200 nk’uko bibugwa.
Ni nyuma y’imirwano ikomeye kuva mu cyumweru gishize yasakiranyije impande zombi muri Teritwari ya Masisi.
Imirwano ikomeye yabereye mu duce twa Kilorirwe na Kitshanga; ndetse bivugwa ko yaba FARDC n’imitwe bakorana ndetse na M23 bayitakarijemo ingabo nyinshi.
Hari amakuru yavugaga ko M23 yaba yaratakarije abarwanyi babarirwa muri 200 mu mirwano yo muri turiya duce twombi; gusa uyu mutwe uvuga ko atari yo.
Umunyamakuru w’Umubiligi, Marc Hoogsteyns, yanditse ku rubuga rwe rwa X ko Bertrand Bisimwa uyobora ishami rya Politiki muri M23 yamwemereye ko hari abarwanyi babo baguye muri iriya mirwano, gusa avuga ko “imibare y’uko ari 200 yakabirijwe.”
Imirwano ikomeye kandi yahurije impande zombi mu duce twa Tongo na Bwiza. Amakuru avuga ko muri Tongo FARDC n’abo bakorana bahatakarije ingabo zibarirwa muri 400; mu gihe izirenga 100 zakomeretse.
Amakuru yiriwe Ku wa Gatatu yavugaga ko M23 yambuwe agace ka Bwiza; Hoogsteyns avuga ko uyu mutwe ari wo ukigenzura aka gace.
