Urwego rw’ubutabera bw’u Burundi ruri mu bibazo bikomeye nyuma y’itabwa muri yombi ry’Umushinjacyaha Mukuru wa Repubulika mu Ntara ya Ngozi, Prosper Yamuremye, ku byaha bya ruswa bikomeye.
Uyu muyobozi akekwaho kuba yararekuye mu buryo budakurikije amategeko umugabo wari ukurikiranyweho kunyereza zahabu nyinshi mu koperative icukura amabuye y’agaciro i Kayanza.
Nk’uko byemejwe n’inzego z’umutekano, Prosper Yamuremye yatawe muri yombi ku gicamunsi cyo ku wa 27 Werurwe 2025, nyuma y’iperereza ryimbitse ryagaragaje imikoranire ye n’uwakekwagaho ubwo bujura.
Amakuru yizewe avuga ko uwo mugabo utatangajwe amazina yatanze ruswa ya miliyoni 20 y’amafaranga y’u Burundi kugira ngo abone uburenganzira bwo kurekurwa.
Mu cyumweru cyashize, uwo mugabo yari yireguye mu rukiko, ariko ibisobanuro yatanze ntibyanyuze abacamanza.
Kubera iyo mpamvu, yahise yimurirwa muri Gereza Nkuru ya Ngozi, ahateganyirijwe abakekwaho ibyaha bikomeye.
Ifatwa rya Prosper Yamuremye ryazamuye impaka ndende ku butabera bw’u Burundi, aho abaturage benshi bagaragaje umujinya wabo kuri ruswa ikomeje kwangiza inzego z’igihugu.
Benshi mu batuye i Ngozi no hirya no hino mu gihugu basabye ko ubutabera bukora akazi kabwo neza, hatitawe ku bushobozi cyangwa imyanya y’ukekwaho icyaha.
Gusa, kugeza ubu, abategetsi bakuru b’u Burundi ntacyo baratangaza ku mugaragaro kuri uru rubanza, nubwo abasesenguzi bahamya ko rushobora kugira ingaruka zikomeye ku isura y’ubuyobozi bwa Perezida Évariste Ndayashimiye mu rugamba rwo kurwanya ruswa.
Amategeko y’u Burundi ateganya ibihano bikomeye ku bayobozi ba Leta bahamijwe ruswa.
Nk’uko biteganywa n’igitabo cy’amategeko ahana, umuyobozi wahamijwe n’icyaha gishingiye kuri ruswa ashobora guhanishwa igifungo cy’imyaka 10, giherekejwe n’ihazabu y’amafaranga menshi.
Nyamara, indorerezi z’ubutabera zisanga nubwo Leta ikomeje gutangaza ko irwanya ruswa, ishyirwa mu bikorwa ry’iyo mikoranire ritaratanga umusaruro ufatika.
Ku rundi ruhande, bamwe babona ifatwa ry’uyu mushinjacyaha wa Ngozi nk’icyemezo cy’ingenzi mu guca burundu ubudahangarwa bw’abayobozi bamwe bagira imbere y’amategeko.
Prosper Yamuremye yabanje kugerageza gusobanura uruhare rwe muri uru rubanza ubwo yari afungiye mu kasho ka SNR (National Intelligence Service), mbere y’uko yimurirwa i Mpimba, Gereza Nkuru ya Bujumbura, ku itariki ya 28 Werurwe 2025.
Ibi byatumye bamwe bavuga ko iri fatwa rifite undi murongo wa politiki, cyane cyane nyuma y’uko umwe mu bacukuzi b’amabuye y’agaciro uregwa yagaragaye avugana na Perezida Ndayashimiye, avuga ko afite andi makuru ku byaha bisa n’ibi yakozwe n’uyu mushinjacyaha wa Ngozi.
Iri fatwa ryongeye gushimangira ikibazo cya ruswa mu butabera bw’u Burundi, cyakomeje kuba inzitizi ku iterambere ry’igihugu.
Abaturage bafite amatsiko menshi yo kureba niba uru rubanza ruzatanga umusaruro, cyangwa niba ruzagenda nk’izindi manza zashyizwe mu itangazamakuru ariko ntihagire igihinduka.
Mu gihe hakomeje gukorwa iperereza ryimbitse, icyo benshi biteze ni ukumenya niba ubuyobozi bw’u Burundi buzashishoza bukarandura ruswa mu butabera, cyangwa niba abashinzwe gucunga amahame y’amategeko bazakomeza gukingirwa ikibaba mu buryo butemewe.
