Umuhanzikazi Marina Deborah yatangaje impamvu yatumye asaba gukuraho indirimbo yakoranye na Yampano kuri YouTube, ashimangira ko byatewe no kutubahirizwa kw’amasezerano bari baragiranye mbere y’uko isohoka.
Mu itangazo yasohoye, Marina yavuze ko yishimira gukorana n’abandi bahanzi, ariko akagena ko byose bigomba gukorwa mu buryo bwubahiriza ubunyamwuga n’amasezerano.
Yavuze ko ibikorwa bye byose abishyira imbere nk’akazi gakomeye, aho agomba gutanga umusaruro mwiza kandi wemewe n’amategeko agenga umuziki.
Yagize ati: “Nshimishwa no gukorana n’abahanzi bagenzi banjye, yaba abamaze igihe mu muziki cyangwa abawutangiye, ariko ni ingenzi ko twese twubahiriza ibyo twumvikanyeho kandi tugakomeza umwuga wacu mu buryo bwizewe.”
“Indirimbo twakoranye na Yampano yasohotse mu buryo butandukanye n’ibyo twari twemeranyijweho, ni yo mpamvu nasabye ko ikurwa kuri YouTube.”
Marina yakomeje avuga ko iki cyemezo atagifashe byoroshye, ahubwo yagendeye ku ntego ye yo gukomeza gukora umuziki ubereye abakunzi be kandi uhamye mu bunyamwuga.
Yongeyeho ko nubwo akomeje gushyigikira abahanzi bafite impano nshya, atazigera yemera ibikorwa bidafite ubunyamwuga cyangwa bitubahiriza amasezerano.
Yagize ati: “Ubu ni uburenganzira bw’umuhanzi wese gukorana n’undi, ariko bigomba kuba mu mucyo no mu bwubahane. Iyo impande zombi zumvikanye ku bintu runaka, ni ngombwa kubahiriza ibyo bumvikanyeho kuko ni byo byubaka icyizere mu ruganda rwa muzika.”
Indirimbo yasabye gukurwaho yari yasohotse kuri YouTube, ariko tariki ya 24 Werurwe 2025 ni bwo byemejwe ko isibwa nyuma y’icyifuzo cye.
Marina yashimangiye ko umuziki we ushingiye ku gukorana n’abandi mu buryo bwemewe, kandi ko azakomeza kwibanda ku gutanga ibihangano bifite ireme.
Yasoje ashimira abafana be urukundo bamugaragariza, abasaba gukomeza kumushyigikira no gusobanukirwa icyemezo yafashe, anizeza ko agiye gukomeza gutanga umuziki mwiza kandi wubahiriza amahame y’umwuga.
Yagize ati: “Ndabashimira ku rukundo rwanyu. Ntimugire impungenge kuko mfite byinshi byiza mbateganyiriza. Icy’ingenzi ni uko tuzakomeza gukora umuziki w’ubunyamwuga kandi uzira amakemwa.”
