Ku wa 14 Werurwe 2025, ku kibuga cy’indege cya Dallas Fort Worth, habaye akavuyo kadasanzwe kateje impagarara zikomeye mu bagenzi.
Umugore witwa Samantha Palma yagaragaje imyitwarire idasanzwe, atungura abari aho ubwo yakuragamo imyenda yose maze agatangira guterana ibipfunsi, gutema no gukomeretsa abantu batandukanye bari hafi ye.
Nk’uko byatangajwe n’ikinyamakuru TMZ, Palma yafashe keleyo maze ajomba abantu babiri, anafata umuyobozi w’akabari aho ku kibuga cy’indege aramuruma.
Iyi myitwarire ye yatumye abantu benshi batangira kwiruka, abandi bagira ubwoba, ndetse bamwe bakifata amashusho y’iki gikorwa kidasanzwe.
Amashusho yacicikanye ku mbuga nkoranyambaga agaragaza Palma mu bikorwa bitandukanye byatunguye benshi.
Yabonetse atema televiziyo yerekana amatangazo y’indege, amena amazi mu kirere, anabyina mu buryo budasanzwe imbere y’abagenzi bageragezaga kwirinda.
Benshi muri bo bari bafite impungenge ko ashobora kuba afite ikibazo gikomeye cy’uburwayi cyangwa yari yanyweye ibiyobyabwenge.
Abashinzwe umutekano bahise bitabazwa, batangira gushakisha aho Palma yihishe. Nyuma y’igihe gito, bamusanze yihishe inyuma y’umuryango w’ubutabazi, umubiri we wuzuyeho amaraso atari aye.
Uko bigaragara, yari amaze igihe afite amaraso y’abo yakomerekeje, bigatuma abamubonye barushaho kugira ubwoba.
Nyuma yo gutabwa muri yombi, Palma yasobanuye ko yari yibagiwe gufata imiti ye yagenwe kuri uwo munsi, ibyo bikaba byaratumye agira iyo myitwarire idasanzwe.
Ubwo yabazwaga n’inzego zishinzwe umutekano, byagaragaye ko asanzwe afata imiti y’indwara zo mu mutwe, kandi kuba atarayifashe byaba byarateje ibi bibazo byose.
Uyu mugore kuri ubu ari gukurikiranwaho icyaha cyo kugirira nabi abantu akoresheje intwaro, ndetse akaba yaranashyizwe mu kato k’abarwaye indwara zo mu mutwe kugira ngo akurikiranwe n’abaganga.
Abashinzwe iperereza bakomeje gushaka ibindi bimenyetso bishobora gufasha kumenya neza icyatumye agira imyitwarire nk’iyo, ndetse no gukurikirana ubuzima bwe bwa buri munsi kugira ngo hamenyekane niba yari afite ibindi bibazo byihariye.
Iki gikorwa cyabereye ku kibuga cy’indege cyahungabanyije abagenzi benshi, bikaba byanateye impungenge ku bijyanye n’umutekano kuri za aeroport, cyane cyane ku bantu bafite ibibazo by’uburwayi bwo mu mutwe batitaweho uko bikwiye.
Inzego z’umutekano zatangaje ko zizongera ingamba zo gukumira impanuka nk’izi mu bihe biri imbere, harimo no gukurikirana abagenzi bafite ibibazo byihariye mu buzima bwabo bwa buri munsi.
