Mu mujyi muto wa Bela Bela, uzwiho kuba icyanya cy’ubukerarugendo n’imvura nyinshi, hari inkuru ivugwa ku buryo butasanzwe ikaba ikomeje kugarukwaho cyane ku mbuga nkoranyambaga.
Si inkuru y’amasezerano ya politiki cyangwa impanuka y’imodoka nk’uko abantu baba bayitegereje kuri radio, ahubwo ni inkuru y’umuntu umwe, igikorwa kimwe, ariko cyateje impaka nyinshi kurusha izindi mu minsi yashize muri Afurika y’Epfo.
Ku munsi umwe usanzwe nk’indi yose, umugabo ukora akazi ko mu busitani, w’umunyarwenya gake ariko w’umunyamurava, yari mu mirimo ye isanzwe ubwo yatoraguraga isanduku y’imyanda hafi ya Shoprite, imwe mu maduka manini muri ako gace.
Mu gihe abandi babona isanduku y’imyanda nk’itarimo icyiza, we yahabonye agatangaza gashobora guhindura ubuzima: amafaranga abarirwa muri miliyoni ebyiri z’amarandi y’Afurika y’Epfo — arenga miliyoni 100 z’amanyarwanda.
Isanduku yari ipfundikiye neza, amafaranga arimo yateguwe mu buryo busobanutse, bitandukanye n’uko abantu batekereza amafaranga yatoraguwe mu bimoteri.
Hari abavuga ko ubwo ari Imana yari imisubije ibyo yabuze imyaka myinshi, abandi bakibaza uko amafaranga nk’ayo ashobora kuba yageze aho.
Ariko ibyo byose byamusabye igisubizo cyihuse. Yari afite amahitamo abiri: gufata ayo mafaranga nk’impano y’Imana cyangwa kuyasubiza nk’igihamya cy’ubupfura.
Yatekereje kuri ayo mafaranga, aho yamujyana, uko yahindura ubuzima bwe n’ubw’umuryango we. Ariko umutima we wamubwiye ibitandukanye n’ibyo amaso ye yabonaga. Yafashe icyemezo kitakorwa na buri wese, ayajyana kuri sitasiyo ya Polisi.
Polisi yaratunguwe, ndetse icyemezo cye cyatangaje benshi. Nyuma y’iperereza, babashije kubona nyirayo — umucuruzi wari wasize ayo mafaranga ku modoka y’ibicuruzwa.
Amafaranga ye yarasubijwe. Naho umukozi w’ubusitani, yahawe ishimwe: ikarita yo guhahisha ifite agaciro ka 500 ZAR — ni ukuvuga nka Frw 37,000.
Icyo gikorwa cyashenguye imitima ya benshi. Hari abamushimiye byimazeyo, aho umwe yagize ati: “Uyu mugabo ni intwari. Si buri wese wabigenza atyo, cyane cyane umuntu ukennye. N’ubwo nta gihembo kinini yahawe, yatsinze ikigeragezo gikomeye.”
Ariko abandi bagiye kure. Bavuze ko yahushije amahirwe y’ubuzima. Umuturanyi we yavuze ko iyo aba ari we, atari kuyasubiza: “Amafaranga y’Imana ntiyihisha. Imana yari yamuremeye amahirwe, arayitesha? Ni ikigwari!”
