UEFA: Muri 1/4 amakipe yo mu Bwongereza aratomboranye naho Barcelone itombora ikipe idakanganye cyane.

Nk’uko byari biteganyijwe kuri uyu wa Gatanu tariki ya 16 Werurwe 2018 mu irushanwa rya UEFA Champions League, hari Tombora y’uko amakipe azahura muri ¼ muri iri rushanwa riruta ayandi ku muagabane w’Uburayi. Aya matombora yabaye akaba  asize amakipe yo mu Bwongereza, Liverpool na Manchester City atomboranye, Real Madrid yongera guhura na Juventus naho FC Barcelona itombola AS Roma.

Iyi tombola yabereye i Nyon mu Busuwisi ku cyicaro cya UEFA, iyoborwa n’abahoze ari ibihangange muri ruhago barimo Umunya-Ukraine, Andriy Shevchenko.

Ikipe ya mbere yabanje gutora mu gakangara ni FC Barcelona yahise itombora AS Roma, Sevilla ikurikiraho itombora Bayern Munich, Juventus itombora Real Madrid naho amakipe abiri yo mu Bwongereza yari asigaye ahita ahura ariko Liverpool ikaba ariyo izabanza kwakira Manchester City.

Ikipe ya Real Madrid muri rusange isa n’ifite amateka akomeye muri iri rushanwa ugererranyije n’andi makipe yose ku Isi kuko imaze kuryegukana inshuro 12 harimo n’ebyiri ziheruka, yageze muri ¼ isezereye Paris Saint Germain, FC Barcelona irifite inshuro eshanu yasezereye Chelsea; Liverpool nayo irifite inshuro eshanu isezera FC Porto naho Bayern Munich nayo imaze kuritwara gatanu isezera Besiktas.

Juventus yo mu Butaliyani imaze gutwara igikombe kabiri, igatsindirwa ku mukino wa nyuma karindwi, yasezereye Tottenham Hotspurs, Manchester City iri gushaka kwibikaho iki gikombe ku nshuro ya mbere yasezereye FC Basel; AS Roma ikuramo Shakhtar Donetsk naho Sevilla ikora ibitari byitezwe isezera Manchester United.

Imikino ibanza ya ¼ izaba hagati y’itariki ya 3 n’iya 4 Mata 2018, iyo kwishyura ibe hagati y’itariki 10 na 11 Mata naho ½ kizakinwa hagati ya 24 na 25 Mata mu mikino ibanza; iyo kwishyura ibe hagati y’iya 1 na 2 Gicurasi. Umukino wa nyuma uzabera i Kiev muri Ukraine ku wa 26 Gicurasi 2018.

Ibitekerezo

Ibitekerezo

Izindi Nkuru wasoma

ITYAZO Radio(Musics & Stories)