Perezida w’Uburusiya, Vladimir Putin, yahamagariye abagabo 160,000 bafite imyaka iri hagati ya 18 na 30 kwinjira mu ngabo z’iki gihugu. Uyu mubare ni wo munini cyane w’abahamagawe mu gisirikare cy’Uburusiya kuva mu mwaka wa 2011, mu gihe icyo gihugu gikomeje umugambi wo kongera ingabo.
Uku guhamagarwa kuje nyuma y’aho Putin avugiye ko Uburusiya bugomba kugira abasirikare bagera kuri miliyoni 2.39, harimo abasirikare bahoraho miliyoni 1.5, bivuze ko hagomba kwiyongeraho abasirikare 180,000 mu myaka itatu iri imbere.
Vladimir Tsimlyansky, umwe mu bayobozi b’ingabo zirwanira mu mazi, yavuze ko aba basirikare bashya batazoherezwa kurwana muri Ukraine mu rugamba Uburusiya bwita “Igikorwa cya gisirikare cyihariye”. Nyamara, hari amakuru avuga ko hari abasirikare bashya binjijwe mu ngabo bagiye bapfa mu mirwano ku mupaka w’Uburusiya, ndetse ko bamwe boherejwe muri Ukraine mu mezi ya mbere y’iyo ntambara.
Guhamagara aba basirikare bizakorwa hagati y’ukwezi kwa Mata na Nyakanga 2025, nubwo hari amagerageza ya Amerika yo kugerageza kugera ku gahenge muri iyi ntambara.
Ku wa Kabiri, Uburusiya bwagabye igitero ku rugomero rw’amashanyarazi mu mujyi wa Kherson muri Ukraine, bituma abantu 45,000 babura umuriro w’amashanyarazi. Nubwo Uburusiya bwanze amasezerano y’agahenge yari ashyigikiwe na Amerika, bwavuze ko bwemeye guhagarika ibitero ku bikorwa-remezo by’amashanyarazi bya Ukraine.
Gusa, ibitero bya drones za Ukraine ku birindiro by’Uburusiya byatumye abategetsi ba Moscow basobanura ko nta masezerano y’agahenge yigeze arengwaho.
Ubusanzwe Uburusiya buhamagarira abasirikare bashya kwinjira mu ngabo kabiri mu mwaka, ariko kuri iyi nshuro hari impinduka:
Umubare w’abahamagawe wiyongereyeho 10,000 ugereranyije n’umwaka ushize.
Imyaka ntarengwa yo kwinjira mu ngabo yavuye kuri 27 ijya kuri 30.
Ubu butumwa bwo guhamagara abasirikare bugezwa ku bagabo b’Uburusiya binyuze ku rubuga rwa leta rwa Gosuslugi, ndetse no ku rubuga rw’umujyi wa Moscow mos.ru.
Kubera ibi, umubare w’Abarusiya bagerageza kwirinda kwinjizwa mu gisirikare nawo urimo kwiyongera, aho benshi bahisemo gukora serivisi yindi ya gisivili itari iyo mu gisirikare.
Putin amaze kongera ingabo z’igihugu inshuro eshatu kuva yategeka igitero kuri Ukraine muri Gashyantare 2022. Minisiteri y’Ingabo y’Uburusiya yavuze ko uku kwiyongera kw’ingabo gushingiye ku “nkeke zirimo kwiyongera” ziturutse ku ntambara yo muri Ukraine no ku “kwaguka gukomeje kubaho kwa OTAN”.
Igitero cy’Uburusiya cyatumye OTAN yongera ibihugu bishya, aho Finland na Suède byinjiye mu muryango. Finland, ifite umupaka muremure wa 1,343 km n’Uburusiya, yafashe icyemezo cyo kongera gukoresha ibisasu bya mine bitegwa mu butaka nk’uburyo bwo kwitegura ibitero bishoboka.
Minisitiri w’Intebe wa Finland, Petteri Orpo, yavuze ko igihugu cye kizifatanya n’ibihugu bituranye n’Uburusiya, nka Pologne n’ibihugu bya Baltic, mu kongera gukoresha ibyo bisasu. Yavuze kandi ko ingengo y’imari y’igisirikare cya Finland izongerwa ikagera kuri 3% bya GDP mu rwego rwo kwitegura ikibazo cy’Uburusiya.
Ibimenyetso bigaragaza ko Uburusiya buri gutakaza ingabo nyinshi muri Ukraine:
BBC na Mediazona bemeje ko abasirikare b’Uburusiya barenga 100,000 bamaze gupfa.
Umubare w’abishwe ushobora kuba urenze inshuro ebyiri ibyo bibare.
Uburusiya bwatangiye gukoresha abasirikare bakorera ku kontaro no gushaka abakozi bo muri Koreya ya Ruguru kugira ngo buzibe icyuho cy’abaguye ku rugamba.
Putin arakomeza umugambi wo kongera abasirikare, ariko icyibazwa ni ese Uburusiya buzashobora guhagarika igihombo cy’ingabo muri Ukraine?
Kubera ibitero bikomeje, no kuba OTAN igenda yaguka, birashoboka ko Uburusiya buzakomeza kwagura igisirikare cyabwo mu mezi ari imbere, cyane ko hakomeje kugaragara igitutu gikomeye gituruka mu Burengerazuba.
