The Ben yahamagawe mu iserukiramuco nyafurika ryiswe “One Africa Music Fest” >>>Inkuru irambuye

Umuhanzi nyarwanda The Ben  yashyizwe mu bahanzi bazitabira iserukiramuco rya ‘One Africa Music Fest’ ribera muri muri Leta Zunze Ubumwe za Amerika n’i Burayi rigamije kwimakaza ubumwe bw’Abanyafurika, azahuriramo n’abahanzi hafi ya bose muri Afurika.

Uyu musore  azaririmba mu iserukiramuco rizabera i New York muri Leta Zunze Ubumwe za Amerika ku wa 10 Kanama 2019. Ni mu gitaramo kizayoborwa na Banky W nawe wamamaye mu muziki wa Nigeria.

Kizabera ahitwa Ford Amphitheater muri Coney Island Boardwalk i Brooklyn.

Muri iri serukiramuco hazaririmbamo abandi bahanzi bakomeye barimo Diamond Platnumz, Eddy Kenzo, Wyclef Jean, Tiwa Savage, Tekno, Jah Prayzah, Burna Boy, Teniola Apata, Harmonize, 2Face Idibia na Nandy.

Hazaba harimo abandi baturutse ku yindi migabane nka Casanova wo muri Amerika na Kranium wo muri Jamaica.

Iki gitaramo The Ben azaba yahuriyemo n’ibi byamamare kizakurikirwa n’ikindi kizabera i Londres mu Bwongereza ku wa 24 Kanama 2019 kizahuriramo ibindi byamamare bitandukanye.

Iki cyo The Ben ntabwo azacyitabira, kizaba kirimo Wyclef Jean, Burna Boy, Stefflon Don, 2Face, Tekno, Eddy Kenzo, Harmonize, Diamond Platnumz,Jah Prayzah n’abandi.

The Ben niwe muhanzi wa mbere ukomoka mu Rwanda witabiriye iri serukiramuco rimaze kuba ubukombe muri Afurika no hanze yayo kuko ryitabirwa n’ibihangange.

The Ben yatumiwe mu iserukiramuco azahuriramo n’abahanzi hafi ya bose bakomeye muri Afurika