Amakuru ari guturuka mu gihugu cya Republika iharanira Demokarasi ya Congo avuga ko kuri iki Cyumweru tariki ya 4 Nyakanga 2024, Umutwe wa AFC/M23 wafashe umupaka uhuza igihugu cya Repubulika iharanira Demokarasi ya Congo ndetse na Uganda.
Uyu mutwe wafashe umupaka wa Ishasha wo mu gace ka Ishasha gaherereye muri Gurupema ya Binza, aha akaba ari mu birometero bisanga 60 uvuye muri Rutshuru-Centre.
Ibi bibaye nyuma y’uko umutwe wa M23 ukomeje kwigarurira uduce twinshi two muri Repubulika Iharanira Demokarasi ya Congo, itarwanye. Wavuga nka Nyamilima iheruka gufata nta mirwano ibayeho.
No muri aka gace ka Ishasha nta mirwano yakabereyemo, kafashwe batarwanye ariko mbere yaho mu gitondo hari habanje kuba imirwano mu kandi gace ka Buganza gaherereye mu birometero 12 uvuye muri aka gace ka Ishasha. Umutwe wa M23 wari uhanganye n’urubyiruko rwa Wazalendo.
Kuri ubu abaturage bamwe na bamwe, abakozi ba Leta, abapolice ndetse n’abandi bahungiye mu gihugu cya Uganda, ni mu gihe igisirikare cya Repubulika Iharanira Demokarasi ya Congo ntacyo kiravuga kuri ibi.
Ibi kandi byabaye kuri uyu wa 4 Kanama 2024, mu gihe biteganyijwe ko agahenge k’imirwano kari kasabwe mu biganiro byahuje u Rwanda na Congo, kagombaga gutangira kuri uyu wa 4 Kanama 2024.
Gusa nubwo aka gahenge kasabwe mu biganiro by’i Luanda, kari kemejwe n’uruhande rwa Congo, u Rwanda ndetse na Angola ariko M23 yarabihakanye ibwira ibihugu byose ko itazatanga aka gahenge kuko itigize igira uruhare mu gushyirwaho kw’aka gahenge.
