Mu rwego rwo gukomeza gukangurira abaturage kubahiriza amategeko n’amabwiriza ajyanye n’umutekano, Polisi y’u Rwanda yibukije abagore b’abasilamu ko imyambaro yemewe mu gihugu ari Jilbaab, Hijaab, na Khimar, mu gihe Nikab, izwiho guhisha umubiri wose uretse amaso (cyangwa rimwe na rimwe n’ayo akagirwa ibanga), itemewe gukoresha ku butaka bw’u Rwanda.
Iyi ngingo ishingiye ku mategeko n’amabwiriza y’igihugu, aho Polisi yagaragaje ko imyambarire igomba guhuza n’amategeko ajyanye n’umutekano rusange.
Muri ayo mategeko, hateganywa ko umuntu agomba kuba ashobora kumenyekana aho ari hose, bityo imyambaro yose ihisha isura yose igafatwa nk’itemewe.
Mu gihe Nikab ifatwa nk’imyenda ituma umuntu adashobora kumenyekana byoroshye, imyambaro nka Jilbaab, Hijaab na Khimar yo yemewe kuko itabuza kumenya isura y’uyambaye.
Nk’uko Polisi ibisobanura, impamvu nyamukuru y’itegeko ribuza Nikab mu gihugu ishingiye ku ngingo z’umutekano. Mu Rwanda, nk’ahandi henshi ku isi, umutekano rusange usaba ko umuntu agomba kuba ashobora kumenyekana aho ari hose.
Iyo hagize uwambara imyambaro yihishemo burundu, nk’uko bimeze kuri Nikab, bigorana kumenya uwo ari we, bikaba bishobora kubangamira inzego z’umutekano, cyane cyane mu bihe by’igenzura no gukumira ibyaha.
Ibihugu bitandukanye byagiye bifata imyanzuro itandukanye kuri iyi myambaro. Mu Burayi, nk’u Bufaransa, u Bubiligi, na Denmark, Nikab yaraciwe mu ruhame kubera impamvu nk’izi zijyanye n’umutekano.
Mu karere, ibihugu nka Chad na Congo Brazzaville na byo byashyizeho amategeko nk’aya mu rwego rwo gucunga umutekano. Mu Rwanda, imyambarire y’abantu igengwa n’amategeko y’igihugu agamije kurinda umutekano w’abaturage no korohereza inzego zishinzwe kuwucunga.
Mu butumwa bwayo, Polisi y’u Rwanda yasabye abaturage gukomeza gukurikiza amategeko no kubahiriza amabwiriza ajyanye n’imyambarire, cyane cyane hagamijwe umutekano rusange.
Polisi yasabye abasilamukazi kwambara imyenda yemewe nta gahato, kandi bagakomeza gukorana n’inzego z’umutekano mu kurushaho gusobanukirwa n’aya mabwiriza.
Yongeyeho ko kutubahiriza aya mabwiriza bishobora kugira ingaruka ku mutekano w’igihugu. Hari ahantu henshi kw’isi habayeho ibibazo by’umutekano bitewe n’abantu bihisha mu myambaro ihisha isura yabo, ari na yo mpamvu inzego z’umutekano zishyiraho ingamba nk’izi.
Gusa Polisi yagaragaje ko nta mpamvu yo guhungabanya ukwemera kw’idini, kuko imyambaro igaragaza isura y’umuntu nka Jilbaab, Hijaab na Khimar yemewe, kandi abagore b’abasilamu bashobora kuyambara mu bwisanzure.
Polisi yagaragaje ko kugira ngo ibi byemezo bigerweho neza, hakenewe ubufatanye hagati y’inzego z’ubuyobozi, imiryango ihagarariye idini ya Islam, n’abaturage muri rusange.
Yasabye ko haba ibiganiro bihoraho bigamije gusobanura impamvu y’aya mabwiriza, kugira ngo hatazagira uwumva ko arimo gukumirwa cyangwa guhezwa.
Ni muri urwo rwego Polisi isaba imiryango n’amadini gukomeza gukorana na Leta mu gutanga ubutumwa bubwira abaturage ko imyambarire igomba kuba ihuje n’amategeko y’igihugu.
Yasabye kandi abasilamukazi gufata iya mbere mu gukurikiza iyi myanzuro kugira ngo hatagira ikibazo kivuka kijyanye n’imyambarire itemewe.
Iki cyemezo gishingiye ku mahame y’igihugu ashyira imbere umutekano w’abaturage bose, ariko nanone kigashyigikira ubwisanzure bw’amadini mu rwego rwo guhuza umuco, umutekano n’amategeko ariho mu Rwanda.
Ni ngombwa ko buri muturage yuzuza inshingano ze mu kubahiriza amategeko, kugira ngo umutekano n’ituze birusheho kwiyongera mu gihugu.
