Perezida Tshisekedi wa Repubulika Iharanira Demokarasi ya Congo yibukijwe ko iyo umubu ukurumye mu myanya y’ibanga (ku bugabo bwawe) udakwiye guhita uwukubita ukoresheje imbaraga nyinshi kuko uhita ugerwaho n’ingaruka mbi.
Ni ibyatangajwe na Manzi Willy usanzwe ari umusesenguzi mu bya Politiki mpuzamahanga ubwo yari mu kiganiro cya Televiziyo Rwanda cyitwa Waramutse Rwanda cyo kuri uyu wa mbere tariki 26 Gashyantare 2024.
Yagize ati: “Hari umugani wa kinyafurika uvuga ko ‘Iyo umubu ukurumye ku bugabo bwawe ntukwiye guhita wukubita ukoresheje imbaraga nyinshi’”
Yakomeje avuga ku makuru yakomeje guhwihwiswa ku mbuga nkoranyambaga avuga ko M23 iri kurwana n’igisirikare cya FARDC igamije gusahura amabuye y’agaciro ya Repubulika Iharanira Demokarasi ya Congo.
Yagize ati: “M23 ntabwo yagiye muri kariya gace gusahura amabuye, bari iwabo, hariya ni iwacu. Baramutse bashaka gufata Rubaya, ndumva atari ho hakomeye kurusha ahandi hose hafashwe.”
Akomeza avuga ko ibihugu bikomeye nka Leta Zunze ubumwe za Amerika byatangiye kuvuga ku ntambara M23 ihanganyemo na FARDC n’abambari bayo ari uko byatangiye kubona ko inyungu zabyo zigeramiwe.
Yongeraho ati: “Rero iyo bavuze Rubaya, ni nk’aho Amerika baba bari kuyibwira bati ‘batangiye kugukubita ku mugongo, haguruka nawe urwane.’”
“M23 ntabwo yagiye muri kariya gace gusahura amabuye, bari iwabo, hariya ni iwacu” @RealManziWilly #WaramutseRwanda pic.twitter.com/VE7NJ4czuu
— Ingabire Egidie Bibio (@EgidieBibio) February 26, 2024
