Kuri uyu wa Gatandatu, tariki ya 27/01/2024, Imirwano ikomeye cyane yongeye kubura hagati y’umutwe wa M23 n’ihuriro ry’Ingabo zirwana ku ruhande rwa Guverinoma ya Repubulika Iharanira Demokarasi ya Congo.
Iyi mirwano yabereye mu bice byinshi byo muri teritware ya Masisi, mu Ntara ya Kivu y’Amajyaruguru, mu gihugu cya Repubulika ya Demokarasi ya Congo. Amakuru atugeraho avuga ko iriya mirwano iri kubera muri Mweso, Karuba, Kingi, Karenga Nengenero na Mbuhi.
Nk’uko byavuzwe imirwano yahereye saa kumi n’imwe za mugitondo, aho Ingabo za FARDC n’abambari ba zo bagabye ibitero mu baturage ndetse n’ahari ibirindiro by’ingabo za M23.
Kugeza ubu ahari kubera urugamba rukaze ni mugace ka Karuba, hafi na Mushaki nkuko umwe mu barwanyi ba M23 yabitangarije MCN.
Kugeza ubu ku ruhande rwa M23 bahagaze neza ndetse ihuriro ry’Ingabo za Repubulika Iharanira Demokarasi ya Congo zatangiye kuyabangira ingata mu bice bya Mweso, Kingi n’ahandi, kuri ubu Mweso na Kingi byamaze kujya mu maboko ya M23.
Iyi mirwano yongeye gukara mugihe ubuyobozi bw’umutwe wa M23 bwaherukaga gutangaza ko butazakomeza kwihanganira ibyo ingabo za Repubulika Iharanira Demokarasi ya Congo ikorera abasivile.
Ni nyuma yuko M23 n’Ingabo za Repubulika Iharanira Demokarasi ya Congo bitavuga rumwe ku bantu 20 bapfiriye mu gace ka Mweso muri teritwari ya Masisi.
Mweso imaze iminsi iberamo imirwano ikomeye ihanganishije M23 n’Ingabo za RDC, FARDC, hamwe n’izindi zirimo iz’u Burundi, iz’umuryango SADC, FDLR, abancancuro n’imitwe ya Wazalendo; zibogamiye ku ruhande rwa Leta.
Ibi byatumye abaturage bongera guhunga ku bwinshi berekeza iya Goma na Kitshanga.
Perezida wa M23, Bertrand Bisimwa, ku gicamunsi cyo ku wa 25 Mutarama 2024 yari yatanze impuruza ko FARDC yarashe muri Mweso, yica abantu 20.
Bisimwa yagize ati “Amashusho ateye ubwoba aturuka Mweso, drone z’ihuriro ry’ingabo za Leta ya Kinshasa zarashe ibice bituwe, bitera ubwicanyi mu baturage b’inzirakarengane. Kinshasa iri gukoresha za drone mu kwica inzirakarengane kure y’ahabera imirwano.”
Nyuma y’iminota 41, Bisimwa yongeye gutangaza ati “Umubare w’agateganyo w’abiciwe na drone n’imbunda ziremereye z’ihuriro ry’ingabo za Leta ya Kinshasa mu mujyi wa Mweso ugeze kuri 20 barimo abasivili b’inzirakarengane.”
Umuvugizi wa FARDC mu ntara ya Kivu y’Amajyaruguru, Lieutenant Colonel Ndjike Kaiko Guillaume, we yatangaje ko M23 ari yo yagabye ibitero ku birindiro byabo mu bice bitandukanye birimo Mweso.
Lt Col Ndjike yasobanuye ko ubwo M23 yavaga muri Mweso, yaharashe amabombe ya Mortier mu baturage, “itera imfu z’abantu 19, abandi 27 barimo inzirakarengane z’abasivili barakomereka.”
Buri ruhande rurasaba amahanga gukurikirana abagize uruhare muri iki gitero kugira ngo bakiryozwe. Ruvuga kandi ko ruzakomeza “kurinda” umutekano w’abasivili uri mu kangaratete.
