Mu ijambo ryaranzwe n’uburakari buciye bugufi ariko bukubiyemo ubutumwa bukomeye, Joseph Kabila wahoze ari Perezida wa Repubulika Iharanira Demokarasi ya Congo, yashyize ahagaragara ibitekerezo bye ku miyoborere ya mugenzi we wamukuriye, Félix Tshisekedi.
twandikire kuri Whatsapp unyuze kuri iyi numero tugufashe: +254 754 537854.
Note: Company, Blog, Church website n'ink'ubuntu.
Ni ijambo ry’iminota 45 ryagaragaje ko umubano hagati y’aba bagabo bombi ushobora kuba ugeze aharindimuka.
Kabila, utaherukaga kuvugira mu ruhame ku bibera mu gihugu, yavuze ko impamvu yacecetse ari uko yifuzaga guha amahirwe ubuyobozi bushya, ariko ngo yahisemo kuvuga kubera “ubutabera bw’amateka” bumusaba kudaceceka imbere y’akaga igihugu cyahuye na cyo.
Ati: “Ntabwo nigeze njya i Goma nk’uko babyanditse, ariko vuba aha nzahagera. Abaturage b’iyo ntara baratereranywe, kandi ndashaka kubereka ko batari bonyine.”
Kabila yahishuye ko mu 2019 yasize igihugu gifite isura nziza: amahoro, igisirikare gikomeye, ubukungu budafite imyenda, n’inzego za Leta zifite icyerekezo. Ariko mu myaka itandatu y’ubutegetsi bwa Tshisekedi, ibintu ngo byarahindutse bikabije.
Ati: “Igihugu cyahinduwe urwenya. Ubutabera bwabaye igikoresho, igisirikare kirirengagizwa, imitwe yitwaje intwaro n’abacanshuro ni bo basigaye bigaruriye ubutegetsi mu bice byinshi. Abaturage babaye nk’abagambaniwe n’abagombaga kubarengera.”
Yongeyeho ko ubutegetsi buriho bwaciyemo ibice abaturage, bukabogamira ku cyenewabo, bukoresha amayeri ya politiki adafitiye abaturage akamaro, ndetse ngo ubukungu bwarasenyutse.
Iri jambo rije mu gihe igihugu kiri mu bibazo bikomeye by’umutekano muke cyane cyane mu burasirazuba, aho abaturage bakomeje gutotezwa, kwicwa cyangwa bagahunga, Leta ikomeje kunengwa kudashyira ingufu mu guhashya ibyo bibazo.
Kabila yasabye ko hakorwa impinduka zifatika: guhagarika intambara, kureka igitugu, gushyira ubuyobozi ku nzego zose z’igihugu, kubaka ubumwe mu baturage, no kuvana igihugu mu maboko y’abanyamahanga.
Ati: “Ntabwo nzatatira indahiro nakoreye igihugu. Nifatanyije n’abaturage, cyane cyane abo mu burasirazuba. Na bo bakeneye amahoro, amashuri, n’ubuzima bwiza nk’abandi.”
Yasoje avuga ko atari umwanzi w’ubutegetsi, ariko ko atazaceceka igihe cyose abaturage bugarijwe, asaba ko Congo yakwiyubaka ku ndangagaciro z’amahoro, ubusugire, n’ubwigenge nyabwo.
Iri jambo rya Kabila rishobora kuzana impinduka mu mboni za politiki ya Congo, rikongera imbaraga mu batavuga rumwe n’ubutegetsi bwa Tshisekedi, kandi rikaba rikangura benshi mu banyagihugu bari baratakaje icyizere.
Ariko kandi, bishobora no kongera umwuka mubi hagati y’impande zombi, bikagira ingaruka ku matora ataha cyangwa ku bukungu bw’igihugu busanzwe bumeze nabi.
