Mwiseneza Josiane yanditsweho igitabo kimugereranya n’umwe mubanyabigwi bakomeye baranze amateka y’u Rwanda

Kugeza ubu, izina Mwiseneza Josiane ryanze kuva mu mitwe ya benshi nubwo ukwezi kwihiritse irushanwa rya Nyampinga w’u Rwanda 2019 ryatumye yamamara rirangiye.

Mwiseneza Josiane akomeje kuba icyatwa! Ni umukobwa wavuzwe ku buryo bukomeye, ibinyamakuru hirya no hino birandika haba mu Rwanda ndetse no mu bihugu bituranye cyane nko mu Burundi.

Uyu mukobwa udasiba mu itangazamakuru avugwa imyato, benshi bakomeza kumwereka ko batazabuzwa kumugwa inyuma nubwo bifuje ko yaba Nyampinga w’u Rwanda ntibigerweho.

Abinyujije mu mpano ye, umusore witwa Gatokeza Munezero David yanditse igitabo agaragaza ibigwi bya Mwiseneza wavugishije benshi mu irushanwa rya Nyampinga w’u Rwanda 2019, bikaza kumuviramo kuba Miss wakunzwe cyane n’abantu ‘Miss Populality’.

Uyu musore w’imyaka 28 yamaze gushyira hanze igitabo kigaragaza amateka ya ba nyampinga, ndetse akongera kwerekana ingingo zigaragaza ko Mwiseneza hari aho ahuriye na Ndabaga twamenye cyane mu mateka.

  1. Iki gitabo yise ‘Nyampinga mu muco yarwanda’ kigizwe n’ibice bine.

Igice cya mbere agaragaza Igisobanuro cy’umuco Nyarwanda. Muri iki gice yasobanuye icyo umuco ari cyo, inkomoko y’iryo jambo ‘Umuco’ ariko by’umwihariko asobanura umuco nyarwanda, agaragaza mu magambo macye amasoko yawo, inkingi zawo, ingingo zawo n’akamaro kawo mu ncamake.

Igice cya kabiri, agaragaza igisobanuro cya nyampinga mu myumvire y’Abanyarwanda. Muri iki gice asobanura ijambo “Nyampinga” akagaragaza aho ryakomotse n’impamvu ari ryo bise abakobwa n’abagore b’ i Rwanda ndetse n’inshingano riha abaryitwa bose.

Igice cya gatatu kivuga kuri Nyampinga na Miss, muri iki gice agaragaza isano n’itandukaniro ry’ ijambo “Miss” na “Nyampinga”, inkomoko y’amarushanwa y’ubwiza ku isi, amarushanwa y’ubwiza yamamaye ku isi, uko irushanwa ry’ubwiza ryaje mu Rwanda n’uko ryitiriwe ” Nyampinga ” n’uko ryakiriwe mu Rwanda.

Igice cya kane ari nacyo avugamo cyane Mwiseneza, yagarutse ku bari n’abategarugori b’icyitegererezo mu mateka y’u Rwanda nka Robwa watabariye igihugu na musaza we Ruganzu I Bwimba mu Gisaka, agaruka kuri Nyirarumaga wabyaye Ruganzu II Ndoli akanamubera umugabekazi.

  1. Asoreza kuri Ndabaga amugereranya na Mwiseneza Josiane ashingiye ku ngingo 12 bahuje.

By’umwihariko ariko yanagaragaje ingingo 10 zatumye Mwiseneza akundwa kurusha abakobwa bose bitabiriye irushanwa rya Miss Rwanda mu mateka yaryo.

  1. Iki gitabo kirimo Josiane yacyanditse imyaka ibiri

Gatokeza avuga ko igitekerezo cyo kwandika iki gitabo yakigize guhera mu 2015 atangira kwibaza ku marushanwa ya ba Miss mu Rwanda no ku Isi yose, atangira kucyandika mu 2016.

Ati “Igitekerezo cyo kwandika iki gitabo Nyampinga mu muco nyarwanda, cyaje mu 2015 ubwo narebaga uko amarushanwa ya ba Miss yagendaga, nibwo natangiye kwibaza kuri iri jambo nyampinga, aho ryaba ryaraturutse naho rihuriye n’aya marushanwa ya Miss”.

“Ntangira kucyandika nandika ibice bitatu kuko kigizwe n’ibice bine icya nyuma nagitangiye mu mpera z’umwaka ushize ubwo hatangiraga amarushanwa ya Miss Rwanda.”

  1. Yanditse igitabo mbere akajya yumva hari ikiburamo

Gatokeza avuga atari azi Mwiseneza yamubwiwe n’irushanwa rya Miss Rwanda 2019, ariko yamara kumenyekana agatangira kumwibazaho. Ikintu cyamushimishije kuri uyu mukobwa ni uburyo yigiriye icyizere by’umwihariko.

Akomeza avuga ko ibyo byatumye agira akanyabugabo kuko mbere ya Mwiseneza yumvaga hari ikintu kiburamo.

Ati “Ibyo nanjye byanteye akanyabugabo ko gutuma mpita nsohora igitabo kuko urumva cyari kimaze imyaka ibiri gihari ariko ntarafata gahunda yo kugisohora kuko nabonaga kitaramera neza, nyuma mbonye inkuru y’uriya mukobwa ndavuga nti kuki nakomeza kwandika ibitabo mbibika, mpita nigira inama yo kugisohora nashyizemo inkuru ye.”

  1. Impamvu yagereranyije Mwiseneza na Ndabaga

Uyu mwanditsi avuga adashidikanya ko Mwiseneza Josiane na Ndabaga bafite aho bahuriye cyane iyo ucukumbuye ugasubira mu mateka.

Ati “Guhuza Josiane na Ndabaga rero bisaba gusubira inyuma mu mateka, abenshi uyu mukobwa nk’uwakoze ibyo abahungu bakoraga. Se yari yaraheze ku rugerero kubera ko nta muhungu umukurayo yari yarabyaye. Ndabaga akajya abyibazaho, aza kubaza nyina impamvu se adataha amubwira ko ari uko nta muhungu yabyaye. Uyu mukobwa yiga imirimo yose ajya kumukura ku rugerero.”

Gatokeza avuga ko ibi bintu Ndabaga yakoze bifite aho bihuriye cyane na Mwiseneza kuko nawe yagiye mu irushanwa rya Miss Rwanda ari umunyacyaro kandi bitari bimenyerewe, ikindi akagenda n’amaguru ikindi benshi bagatekereza ko ibintu bikorerwa muri iri rushanwa atazabishobora ariko aza kwerekana ko abishoboye.

  1. Ntabwo yashatse kubaka izina yisunze Mwiseneza

Gatokeza avuga ko buri wese ashobora kubona yarashyize Mwiseneza muri iki gitabo cye akabyumva uko ashaka ariko we ataricyo yari agambiriye.

Ati “Buri wese ashobora kubifata uko abyumva, ariko byanjemo pe. Urabona ushobora kuba uri kugenda ukabona ikintu kikakwibutsa inganzo. Ni muri ubwo buryo nahisemo gushyira hanze iki gitabo mu gihe cye.”

Gatokeza wanditse iki gitabo ni umushakashatsi n’umwanditsi ku muco nyarwanda. Ubu ari kwiga kaminuza mu by’imibereho, imibanire n’amajyambere by’abantu muri Atlantic International University.

Yanditse ibitabo bitandukanye birimo icyitwa ‘Nta muco nta buzima’, ‘Inzira y’umuco nyarwanda mu majyambere y’Isi’n’ibindi byinshi akiri gutunganya.

Iki gitabo yanditse kuri Josiane Mwiseneza ubu kiraboneka ahantu hatandukanye nko kuri A-Z bookshop mu mujyi muri CHIC inyuma ya BK, no kuri ISPA bookshop I Remera uva ku Gishushu ujya kwa Lando munsi ya Beausejour Hotel kigiye no gutangira gucuruza kuri Caritas bookshop.