Umulisa Charlotte, uzwi nka Princess Cici, wabaye Miss Supranational Rwanda 2022, yambitswe impeta y’urudashira n’umukunzi we bahuriye kuri Facebook.
Uyu mukobwa uba muri Pologne yahamirije IGIHE ko umukunzi we akomoka muri iki gihugu kandi bakundanye nyuma yo guhura kuri Facebook.
“Aba muri Pologne, twahuriye kuri Facebook bitangira tuvugana bisanzwe nyuma turakundana.”
“Sinzi uko byaje ariko ni inshuti, akaba n’inshuti yanjye magara,” ni amagambo ya Princess Cici aganira na kiriya gitangazamakuru.
Ku bijyanye n’ubukwe bwabo, yavuze ko ataramenya ibisobanuro byose kuko umukunzi we ari we uzabimenyesha, ariko avuga ko buzaba vuba.
Ati: “Iby’ubukwe byo bizamenywa n’umukunzi wanjye, ariko nawe nzi ko afite amatsiko yabyo. Vuba aha muzabimenya.”
Miss Umulisa Charlotte yari yatorewe guhagararira u Rwanda muri Miss Supranational International 2022, ariko ntiyabashije kwitabira kubera ibibazo byabayeho.
Iri rushanwa ryari rigiye kuba ku nshuro ya 13, rikabera muri Pologne, aho u Rwanda rwatangiye kwitabira guhera mu 2012.
Mu 2021, yari yitabiriye irushanwa rya Miss Warsaw, aho yaje mu bakobwa 10 ba mbere.
Uretse ibyo, Umulisa yari asanzwe ari umunyamakuru kuri TV Bet yo muri Pologne, aniga ibijyanye n’ubukerarugendo n’amahoteli, ibyo yaminujemo.
Nubwo atabashije kwitabira Miss Supranational 2022, ubwo yatangazwaga nk’uhagarariye u Rwanda, yari yavuze ko yiteguye kwitwara neza.
Kuri ubu, mu gihe ategura ubukwe n’umukunzi we, abakunzi be bakomeje kumwifuriza ishya n’ihirwe mu rugendo rushya atangiye.
