Kuri uyu wa kane tariki 07 Werurwe 2024, mu burasirazuba bwa Repubulika Iharanira Demokarasi ya Congo, i Kibirizi muri Rutshuru hubuye imirwano hagati ya Wazalendo/FARDC ndetse na M23 yamaze kwigarurira agace ka Somikivu gakungahaye ku mabuye y’agaciro.
Akanama k’urubyiruko muri kariya gace kavuze ku mirwano yabaye hagati y’ihuriro ry’ingabo zirwana ku ruhande rwa Repubulika Iharanira Demokarasi ya Congo na M23.
Umwe mu bagize akanama k’urubyiruko yagize ati: “Muri iki gihe kurasana biri mu mpande zose muri kibirizi.”
“Turimo kumva iturika ry’intwaro ziremereye n’izoroheje ahakikije Kibirizi hose. Abarwanyi ba M23 banyuze mu misozi bagabye ibitero ku birindiro byose bya wazalendo. Abaturage bose bahunze bamaze kuva muri kariya gace.”
Ibi biravugwa nyuma y’aho M23 wafashe ‘centre’ ya Nyanzale muri teritwari ya Rutshuru nyuma y’imirwano ikaze.
M23 amaherezo yashoboye guca ku bwirinzi bw’ingabo za FARDC na Wazalendo kuva Ngoroba na Lushebere kugeza bafashe imidugudu Kirima na Kashalira.
Nyuma y’uko yigaruriye agace ka Nyanzale kari gasanzwe kagenzurwa n’ingabo za Repubulika ya Demokarasi ya Congo hamwe n’abo bafatanyije urugamba, ubu M23 yahise yigarurira gace ka Somikivu gafite ibirombe bifatwa nk’ibyakabiri nyuma y’ibya Rubaya.
Aka gace gacukurwamo amabuye y’agacio ahambaye yo mu bwoko bwa Niobium asanzwe avamo ibyuma bidasanzwe, moteri z’indege, imiyoboro y’ibyogajuru, roketi z’imbunda ziremereye n’izindi mbunda zirasa kure na hafi.
Aka gace gaherereye mu birometre 100 werekeza mu mujyi wa Goma, uzwi nk’umurwa mukuru w’Intara ya Kivu y’Amajyaruguru, mu Burasirazuba bwa Repubulika ya Demokarasi ya Congo.
Aka gace niko M23 yamaze kukigarurira nyuma y’uko abarwanyi ba Gen. Sultan Makenga bafashe ibindi bice bikomeye, mu mirwano imaze iminsi ibiri ibera mu duce tumwe turi muri Rutsuru utundi muri Masisi, nka Gatsiro, Mabenga, ibirindiro bikomeye bya gisirikare bya Majengo, Ngoroba na Kashalira.
Iyi mirwano ikomeye yabaye kuva ku munsi wa Mbere w’iki Cyumweru, yabaye nyuma y’uko i Goma hari hateranye inama idasanzwe y’abagaba bakuru b’Ingabo z’ibihugu bifite abasirikare baje gufasha igisirikare cya leta ya Repubulika Iharanira Demokarasi ya Congo kurwanya M23.
