Kuki Ndayishimiye yohereje mu za bukuru ba Jenerali barimo Ndakugarika mu buryo bwatunguye benshi?

Mu buryo butunguranye, Perezida w’u Burundi Evariste Ndayishimiye, ku wa Mbere tariki ya 19 Gicurasi 2025, yashyize mu kiruhuko cy’izabukuru ba Jenerali babiri bakomeye muri Polisi y’u Burundi. 

Muri bo harimo Lieutenant-Général de Police Gérvais Ndirakobuca, uzwi cyane ku izina rya Ndakugarika, wari Minisitiri w’Intebe, ndetse na Général-Major Générose Ngendanganya, umugore wa mbere ugeze ku ipeti rihanitse kurusha abandi bose mu gihugu. 

Gérvais Ndirakobuca, w’imyaka 55, ni umwe mu bantu bakomeye mu nzego z’umutekano w’u Burundi, wanagize uruhare rukomeye mu gucunga umutekano w’imbere mu gihugu mu bihe by’amage.  

Yari Minisitiri w’Umutekano mbere y’uko ahabwa kuyobora muri Guverinoma nka Minisitiri w’Intebe mu 2022, asimbuye Gén. Alain-Guillaume Bunyoni, nawe wari usanzwe ari umwe mu ntagondwa z’ishyaka CNDD-FDD. 

Izina Ndakugarika ryamuhesheje isura y’umugabo ukomeye, udapfa gusubira inyuma ku cyemezo yafashe, akaba yaranakoze ibikorwa bitavugwaho rumwe mu myaka yashize cyane cyane mu guhosha imyigaragambyo y’abatavuga rumwe n’ubutegetsi bwa Nkurunziza. 

Undi washyizwe mu kiruhuko cy’izabukuru ni Général-Major Générose Ngendanganya, umugore wa mbere mu Burundi wageze ku rwego rwo hejuru mu nzego z’umutekano. 

Yakoreraga muri Komisiyo Ihoraho ishinzwe kurwanya ikwirakwizwa ry’intwaro nto n’izoroheje muri Minisiteri y’Umutekano. 

Uretse kuba yari icyitegererezo mu bagore binjiye mu nzego za gisirikare, Ngendanganya yari asanzwe azwiho ubunyamwuga, isuku mu mikorere no kwitandukanya n’ibikorwa bya politiki bikunze gusesereza inzego z’umutekano mu Karere. 

Abasesenguzi benshi barimo kwibaza ku mpamvu nyakuri zateye Perezida Ndayishimiye gufata icyemezo cyo gusezerera aba bayobozi bombi mu gihe bari bakiri bato ku myaka y’izabukuru isanzwe y’abasirikare, cyane ko Ndirakobuca afite imyaka 55 gusa. 

Hari abibaza niba ibi bidashobora kuba igisubizo cya Ndayishimiye ku mutekano muke umaze iminsi ugaragara mu gihugu, cyane cyane mu Burasirazuba no mu karere ka Bujumbura, aho imitwe yitwaje intwaro ikomeje gutera ibibazo.  

Hari n’ababona ko iyi ari strategiya yo gusukura inzego z’umutekano no gushyira abantu bashya begera Perezida aho gushyira imbere ababa baragiye begamira izindi mbaraga mu buyobozi bwa CNDD-FDD. 

By’umwihariko, Ndirakobuca yagiye agaragazwa nk’umwe mu bafite uruhare rukomeye mu gukandamiza abatavuga rumwe n’ubutegetsi bwa Nkurunziza, ndetse bivugwa ko umubano we na Ndayishimiye utari umeze neza mu mezi aheruka. 

Izi mpinduka zishyira mu buryo bugaragara umugambi wa Perezida Ndayishimiye wo guhindura imiterere y’ubutegetsi bwari bwarubakiye ku nkorokoro z’ingabo na Polisi, asimbuza abantu batavugwaho byinshi cyangwa se abo yizeye bihagije.  

Ibi byabaye no ku bayobozi batandukanye muri CNDD-FDD bagiye bakurwa ku butegetsi cyangwa bagashyirwa ku ruhande mu nzego zifata ibyemezo. 

Hari abavuga ko ari ikimenyetso cy’uko Ndayishimiye ashaka kwiyubakira ubutegetsi bwe ku buryo buhamye, agakuraho igitutu cy’inkorokoro zamutsikamiraga cyangwa zamushidikanyagaho kuva yafata ubutegetsi mu 2020. 

Nubwo ishyirwa mu kiruhuko cy’izabukuru rya Ndakugarika na Ngendanganya rishobora kugaragara nk’impinduka zisanzwe, hari ibimenyetso ko ari igice cy’ihinduramatwara yihuse mu miyoborere y’igihugu, by’umwihariko mu rwego rw’umutekano. 

Perezida Ndayishimiye yaba ari kugerageza gucengera no gusubiza ibintu ku murongo nyuma y’imyaka myinshi y’ubutegetsi bwa gisirikare, kugira ngo yigaragaze nk’umuyobozi utari igikoresho cy’abamubanjirije, ahubwo ushaka ubwigenge bw’imiyoborere. 

Impinduka nk’izi, nubwo zishobora kugira ingaruka mu gihe gito, zishobora no kuba intangiriro y’icyerekezo gishya cy’u Burundi mu bijyanye no guteza imbere imiyoborere ishingiye ku mahoro, umutekano n’imiyoborere isesuye.