Leta Zunze Ubumwe za Amerika ziritegura gukora impinduka zikomeye mu rwego rwa dipolomasi, aho zishobora gufunga Ambasade n’ibiro byazo by’ubuhagarariye (Consulats) mu bihugu bitandukanye ku isi.
Ibi biri mu nyandiko y’imbere ya Minisiteri y’Ububanyi n’Amahanga ya Amerika yashyizwe ahagaragara n’igitangazamakuru gikomeye, The New York Times.
Iyo nyandiko igaragaza ko ubutegetsi bwa Perezida Donald Trump bwashyize ku rutonde Ambasade 10 na Consulats 17 bishobora gufungwa, aho byinshi muri byo biri ku mugabane wa Afurika.
Ni icyemezo gikomeje guteza impaka ndende, cyane cyane mu bijyanye n’ukugabanya ijambo Amerika yagize mu myaka myinshi ishize mu mibanire mpuzamahanga, cyane cyane mu bihugu bifatwa nk’ingenzi mu rwego rwa politiki n’umutekano.
Mu bihugu bigera ku 10 bishobora gufungwamo Ambasade, birindwi biri muri Afurika. Muri byo harimo Repubulika ya Centrafrique, Eritrea, Gambia, Lesotho, Congo-Brazzaville, Sudani y’Epfo ndetse na Cameroon (mu mujyi wa Douala aho hari Consulat).
Ibi bihugu byose bifite akamaro kihariye mu migenderanire mpuzamahanga, yaba mu bijyanye n’amahoro, ubutunzi cyangwa umutekano.
Gufunga Ambasade muri ibi bihugu bivuze kugabanya ubushobozi Amerika yari ifite mu gucunga inyungu zayo ku mugabane w’Afurika – ibintu byafunguriye amahirwe igihugu cy’u Bushinwa cyamaze gufata iya mbere mu gushora imari no gushimangira imikoranire n’ibihugu byinshi by’Afurika.
Impamvu zitangwa n’ubutegetsi bwa Trump zitunga agatoki igabanuka ry’ingengo y’imari y’ibigo bya Leta. Gusa, abasesenguzi ntibabibona nk’impamvu ihagije.
Hari impungenge ko iki cyemezo kigaragaza politiki nshya ya “Amerika ibanza” (America First) yirengagiza inshingano mpuzamahanga igihugu cyari gisanzwe gifite – ibintu bishobora kugabanya imbaraga za Washington ku rwego mpuzamahanga.
Ni icyemezo gishobora kongera ubwigunge ku baturage b’Amerika baba muri ibi bihugu, by’umwihariko abacuruzi, abanyeshuri, abashoramari ndetse n’abashinzwe umutekano.
Serivisi zo gutanga visa, gutanga ubufasha mu by’amategeko cyangwa ubuvuzi, byose bishobora guhagarara cyangwa bikimurirwa mu bihugu bituranye – ibintu bishobora gutuma abenshi bacika intege mu kugirana imikoranire n’Amerika.
Mu gihe Amerika iri gukuramo amaboko, u Bushinwa bwo buragenda busa n’ubucengera. Mu myaka 20 ishize, Beijing yashinze Ambasade n’ibiro by’ubuhagarariye mu bihugu hafi ya byose by’Afurika, inashora imari mu bikorwa remezo, itanga inguzanyo, ndetse igafasha mu kubaka ibitaro, imihanda, ibibuga by’indege n’ibindi.
Gusa, ibyo byose bijyana no gutsura umubano wa politiki, aho benshi batangiye kubona u Bushinwa nk’inshuti nyakuri.
Gufunga Ambasade na Consulats mu bihugu nk’ibya Centrafrique cyangwa Sudani y’Epfo – ibihugu bifite amateka y’intambara n’amakimbirane, bishobora gutuma Amerika itakaza icyizere n’uruhare rwayo mu bikorwa by’amahoro n’ubwiyunge, ibintu u Bushinwa bwahita bukoresha mu nyungu zabwo.
Nubwo aya makuru ari ayo mu nyandiko y’imbere ya Minisiteri y’Ububanyi n’Amahanga, biracyasaba ko iki cyemezo cyemezwa n’Inteko Ishinga Amategeko ya Amerika mbere y’uko gishyirwa mu bikorwa.
Ariko uko byagenda kose, itangazo nk’iri ryonyine rihagije ngo rihungabanye icyizere mu bihugu Amerika yari isanzwe ifitamo ijambo rikomeye.
Mu gihe u Bushinwa buri kurushaho kugera kure ku migabane itandukanye, cyane cyane muri Afurika, ibi birerekana ko amahanga ari guhindura isura.
Politiki za dipolomasi z’ibihe byashize zishingiye ku kwagura no gutera inkunga imishinga y’amajyambere zirimo gusimburwa n’inyungu zishingiye ku mutekano n’ubukungu by’imbere mu gihugu.
Ese Amerika iri gusubira mu mateka yayo ya mbere y’Intambara ya Kabiri y’Isi yose, igihe yahitagamo kwitarura ibibazo by’Isi? Ese ni igihe cyo guha umwanya ibihugu nk’u Bushinwa, u Burusiya cyangwa u Buhinde ngo bigire uruhare rugaragara mu miyoborere y’Isi?
Afurika igomba kureba kure. Gufunga Ambasade za Amerika ni inyandiko ifunguye ku bihugu bya Afurika ngo bishimangire umubano n’abandi bafatanyabikorwa bashya, ariko na none ni igihe cyo kwisuzuma no gushyira imbere inyungu z’akarere.
Hari igihe Afurika yaterwaga ishema n’uko Ambasade y’igihugu cy’igihangange nka Amerika iri i Kigali, Addis Ababa cyangwa i Kinshasa. Ariko igihe kirageze ngo ibihugu by’Afurika bifate iya mbere mu gutegura ahazaza habyo – hadategerejwe gusa ubutumwa buvuye i Washington.
