- Tariki ya 18 Werurwe 2024 nibwo byatangajwe ko Vladimir Putin yatsinze amatora y’Uburusiya ku bwiganze bw’amajwi hafi 90%.
Abinyujije ku rukuta rwe rwa X Perezida Evariste Ndayishimiye w’u Burundi yashimye Perezida Vladimir Putin ku «intsinzi ishashagirana» ndetse amwita «umutegetsi ureba kure». Ndayishimiye ni umwe mu bategetsi bakomeje gutangaza ubutumwa bw’ishimwe, mu gihe hari n’abanenga iyo ntsinzi.
Putin yatsinze amatora yo ku cyumweru ku bwiganze n’amajwi 87%, urebye nta gushidikanya kwari kuriho ko azatsindira manda ya gatanu.
Perezida Putin ntavugwaho rumwe ku isi, cyane cyane nyuma yo gutangiza intambara kuri Ukraine mu 2022.
Ku byerekanwa n’amatora, imbere mu gihugu cye aracyari umutegetsi ukunzwe cyane, ariko mu batamushyigikiye iyo indi nkuru.
Abarwanya ubutegetsi bwe bavuga ko ari umunyagitugu udatinya kwica mu kwikiza abatavugarumwe nawe.
Vives félicitations au Président Vladimir Poutine pour sa brillante réélection à la tête de la Fédération de Russie,qui témoigne éloquemment de la confiance et de l’adhésion du peuple russe à son leadership visionnaire.
Le #Burundi réitère son amitié et sa coopération à la Russie pic.twitter.com/bRJWeOtCdD— SE Evariste Ndayishimiye (@GeneralNeva) March 18, 2024
Vuba aha bamushinje kwica Alexei Navalny wari ufunze, gusa we mu ijambo aherutse gutangaza yavuze ko ahubwo “niteguraga kumurekura mu iguranwa ry’imfungwa”, ko inkuru y’urupfu rwa Navalny nawe yamutunguye.
Uretse mu Burusiya, no mu mahanga ntabonwa kimwe, intsinzi ye mu matora n’ibirimo kuyivugwaho birabyerekana.
Iburengerazuba baramagana intsinzi ye
Ibihugu nka Amerika, Ubwongereza, Ubumwe bw’Uburayi, na Ukraine birumvikana, biravuga ko amatora aheruka mu Burusiya nta demokarasi cyangwa ubwisanzure byari biyarimo.
Vedant Patel umuvugizi wa minisiteri y’ububanyi n’amahanga ya Amerika yabwiye abanyamakuru ati: “Ndumva navuga ntashidikanya, ko nta telephone izahamagara yo kumushimira ivuye muri Leta Zunze Ubumwe za Amerika.”
Norway/Norvège ihana urubibi n’Uburusiya yavuze ko kuba amatora yarakozwe no mu bice bya Ukraine byafashwe n’Uburusiya ari “uguhonyora gukomeye amategeko mpuzamahanga”.
Perezida Volodymyr Zelensky wa Ukraine we yavuze ko amatora yo mu Burusiya yari “ukwigana” amatora ya demokarasi.
Melanie Joly, minisitiri w’ububanyi n’amahanga wa Canada yavuze ko amatora yo mu Burusiya ataranzwe na demokarasi kandi yarimo inenge nyinshi.
Ndayishimiye, Goïta, Traoré cyangwa Umwami Salman bashimye intsinzi ya Putin, Mu burasirazuba no mu bihugu bimwe bya Africa abategetsi baho bo batangaje ibyishimo bagize ku ntsinzi ya Putin.
Perezida Evariste Ndayishimiye w’u Burundi yatangaje kuri X ko “intsinzi ishashagirana” ya Putin isobanuye uburyo abaturage b’icyo gihugu bashyigikiye “ubutegetsi bwe bureba kure”.
J'adresse mes félicitations au président #Vladimir POUTINE pour sa réélection, ce dimanche 17 mars, à la tête de la Fédération de Russie.
En mon nom propre et en celui du peuple burkinabè, je lui formule des vœux de plein succès.
Que ce nouveau mandat contribue au renforcement… pic.twitter.com/LZkG6w6xQg— Capitaine Ibrahim TRAORÉ (@CapitaineIb226) March 18, 2024
Kapiteni Ibrahim Traoré wa Burkina Faso nawe yashimye intsinzi ya Putin avuga kandi ko yiteze ko imibanire y’igihugu cye n’Uburusiya izarushaho kuba myiza.
Colonel Assimi Goïta wa Mali nawe yashimiye Putin ku ntsinzi ye, amwifuriza kugera ku ntego ze, amwizeza ubucuti bwa Mali. Ibiro bya Perezida wa Niger byasohoye itangazo risinyweho na General Abdourahamane Tchiani nawe uherutse gufata ubutegetsi kuri ‘coup d’état’, avuga ko yishimira “intsinzi ishashagirana” ya Putin.
J’adresse mes vives félicitations au Président #poutine2024 pour la confiance renouvelée par son Peuple et lui souhaite plein succès dans l'accomplissement de ses hautes fonctions. En sa qualité de partenaire stratégique et sincère du Mali, je lui renouvelle toute notre amitié pic.twitter.com/edEJQ01BYl
— Colonel Assimi GOITA (@GoitaAssimi) March 18, 2024
Gen Tchiani yaboneyeho gusaba Putin ubwe n’Uburusiya gufasha Mali “mu rugamba iriho rwo kwisubiza ubusugire bwayo”. Ibindi bihugu nk’Ubuhinde, Iran, Syria na Korea ya Ruguru nabyo byashimiye kumugaragaro Putin ku ntsinzi ye.
Birashoboka ko hari ibindi bihugu byakoze nk’ibi mu buryo butashyizwe ahabona.Gusa kugeza ubu umubare utari muto w’ibihugu bya Africa, usa n’uwifashe mu gushimira kumugaragaro intsinzi ya Putin.
