Amakuru aturuka ku mirongo y’imbere ku mbuga y’urugamba ruhanganishije M23 na FARDC ifatanyije n’abambari bayo, aravuga ko abarinzi ba Pariki ya virunga 20 n’aba Wazalendo 67 bafatiwe mu mirwano yahanganishije M23 na FARDC i Rwindi.
Umwe mu bayobozi b’ikigo cyitwa ICCN gishinzwe ubukerarugendo ,kurengera ibidukikije muri Repubulika iharanira Demokarasi ya Congo, uri i Kanyabayonga avuga ko hari abarinzi b’iki kigo bafatiwe mu ntambara bari kurwana ku ruhande rw’ingabo za Leta FARDC.
Uyu muyobozi avuga ko igice kinini cy’ishyamba rya Rwindi gisanzwe kiri mu bugenzuzi bwa ICCN, akaba aribyo byatumye abarinzi b’ishyamba binjira mu ntambara yo gufasha ingabo za Repubulika Iharanira Demokarasi ya Congo mu buryo butaziguye.
Aya makuru yemejwe kandi n’umwe mu baturage batuye Kibirizi utashatse ko amazina ye atangazwa.
Uyu muturage ubwo yaganiraga n’ikinyamakuru Rwanda Tribune yagize ati: “Nibyo koko abarinzi ba Pariki n’imbunda zabo bafatiwe mu mirwano barwana ku ruhande rwa FARDC sibo gusa kuko n’abaturage bene wacu bari baragiye mu mitwe ya Wazalendo hari abafashwe mpiri.”
Agace ka Rwindi kagizwe n’amoko y’abanandi n’abahutu basanzwe badacana uwaka, abasesnguzi mu bya politiki bavuga ko muri iki gihe igice kinini cyari gituwemo n’abahutu b’abakongomani cyamaze kwigarurirwa na M23.
Aba basesenguzi bakomeza bavuga ko benshi mu bahutu b’abakomgomani bari ku ruhande rwa Guverinoma, ubu iki gihe bakaba bari mw’ihurizo rikomeye ry’aho bazahungira, kuko abanande babahaye ubutumwa butomoye bubasaba kugumana na M23 mu bice yigaruriye, kuko bo batabashaka iwabo.
