AS Kigali nyuma y’uko itsinze Gasogi 1-0, perezida wa Gasogi United, Kakooza Nkuriza Charles [KNC], yatangaje ko aseshe iyi kipe kubera ko adashobora kwihanganira umupira urimo umwanda.
Ni nyuma yo gutsindwa na AS Kigali 1-0 mu mukino w’Umunsi wa 18 wa Shampiyona ya 2023-24 wabereye kuri Kigali Pelé Stadium kuri uyu wa Gatandatu tariki ya 27 Mutarama 2024.
Ati “Twihanganiye imisifurire inshuro nyinshi, haba mu bato no mu buryo bwose. Ikipe yitwa Gasogi United turayiseshe. Tugiye kureba abo dufitiye amadeni, abakinnyi bashaka kugenda bagende, ntabwo tuzongera gushora na rimwe mu mupira wo mu Rwanda.”
KNC yavuze ko yamaze kumenyesha abakinnyi n’abatoza ko yamaze gusesa iyi kipe atazongera gushora mu mupira w’u Rwanda.
Yashinje umusifuzi kubasifurira nabi, agakora ibishoboka byose ngo batsindwe abima amahirwe amwe n’amwe harimo na penaliti.
Ibi byatumye abafana benshi b’ikipe ya Gasogi United batakira neza iki cyemezo, bamwe bavuga ko hagakwiye kurebwa uburyo ibi bikosoka ariko hatabayeho gusesa iyi kipe kandi yari maze kugira abafana benshi.
Tariki ya 27 Mutarama 2022, KNC nabwo yigeze gufata icyemezo nk’iki, hari nyuma yo kwijujutira ko abasifuzi batamusifuriye neza bituma Rayon Sports ibatsinda 1-0.
