Mu gitondo cyo ku wa Mbere tariki ya 21 Mata 2025, isi yose yatunguwe n’inkuru y’incamugongo y’urupfu rwa Nyirubutungane Papa Francis, Umushumba wa Kiliziya Gatolika ku Isi, wapfuye afite imyaka 88 y’amavuko.
Inkuru yatangajwe na Vatican yahise ikwirakwira ku isi hose, ikurikirwa n’amarira, amasengesho, n’icyubahiro gikomeye cyatangwaga kuri uyu muyobozi wagaragaje urukundo, ubutwari n’ubumuntu mu myaka 12 yamaze ku ntebe y’ubupapa.
Mu Rwanda, Inama y’Abepisikopi Gatolika iyobowe na Antoine Cardinal Kambanda, yagaragaje akababaro gakomeye, igira iti: “Adusigiye urugero rwiza rw’umwigishwa w’ukuri wa Yezu. Turagije Roho ye urukundo n’impuhwe by’Imana.”
Ibi byahise binatuma hatangira kwibazwa ku musimbura wa Papa Francis, aho izina rya Antoine Cardinal Kambanda ryavuzwe kenshi nk’umwe mu banyafurika bashobora kuba Papa mu ba mbere bakomoka kuri uyu mugabane.
Antoine Cardinal Kambanda yavukiye i Kigali ku wa 10 Ugushyingo 1958, Antoine Kambanda ni umwe mu bayobozi b’abihayimana bafite amateka akomeye mu Rwanda. Yize Filosofi na Teolojiya muri Seminari Nkuru ya Nyakibanda, yongera gukomereza muri Kaminuza ya Laterani i Roma, aho yakuye impamyabumenyi ihanitse mu bijyanye na Teolojiya y’Imibanire.
Mu 2013, yahawe Ubwepiskopi na Papa Benedigito wa XVI, aba Arkiyepiskopi wa Kigali mu 2018, mbere yo kugirwa Cardinal na Papa Francis mu 2020. Niwe Munyarwanda wa mbere wageze kuri urwo rwego rwo hejuru muri Kiliziya Gatolika.
Cardinal Kambanda azwiho kugira icyerekezo gishingiye ku bumwe, amahoro n’ubwiyunge, ndetse afatwa nk’umwe mu banyabwenge ba Kiliziya muri Afurika. Imvugo ye icisha bugufi n’imyitwarire y’umunyamurava bimugira umuntu uhabwa icyizere.
Nubwo bishobora kumvikana nk’inzozi, hari impamvu zitandukanye zituma benshi batekereza ko Cardinal Kambanda ashobora kuba Papa kubera izi mpamvu:
Isura nziza n’ubumuntu buhambaye
Kambanda afite isura idafite ibibazo byigeze bigaragara kuri bamwe mu bayobozi ba Kiliziya – ibibazo by’ubusambanyi cyangwa ruswa. Ni umuntu wiyubashye, udafite ibitotsi by’amateka bigaragaraho amakosa.
Amateka ye nk’umuyobozi muri Afurika ihanganye n’ibibazo
Kuba yarayoboye Kiliziya mu Rwanda nyuma ya Jenoside yakorewe Abatutsi, akagira uruhare mu bumwe n’ubwiyunge, bimugira umuntu uzi guhuza abantu no kuyobora Kiliziya mu bihe bikomeye.
Kuba Kiliziya muri Afurika iri kwiyongera cyane
Umugabane wa Afurika ugaragaza ubwiyongere bukomeye mu mubare w’abakirisitu, ku buryo kuba Papa w’umunyafurika byaba ishema kuri Kiliziya ifite intego yo kugera ku mpande zose z’isi.
Uburezi n’ubunararibonye mpuzamahanga
Kambanda afite ubumenyi mu bijyanye n’uburezi n’imibanire, kandi afite imikoranire myiza n’abayobozi ba Kiliziya bo muri Amerika n’i Burayi.
Imbogamizi zishobora kumukoma mu nkokora
Ubunararibonye bukiri buke muri Vatican
Nubwo yabaye Cardinal mu 2020, ari mu bayobozi bakiri bashya mu buyobozi bw’imbere muri Vatican. Ibi bishobora gutuma ataragira umubare uhagije w’abamushyigikira mu matora y’abatora Papa.
Imiterere ya Kiliziya itarahindura isura yayo y’uburayi
Amatora ya Papa agengwa n’igitugu cy’amateka, aho uburayi n’Amerika bagiye bagira ijambo rikomeye. Kugeza ubu, Afurika ntiragira ijwi rikomeye muri ayo matora.
Hari abandi banyafurika b’abahanga
Cardinal Peter Turkson wo muri Ghana, wigeze kuyobora Dicastery y’ubutabera n’iterambere, afite ubunararibonye n’ubushobozi buhambaye mu miyoborere ya Vatican. Niwe munyafurika uhabwa amahirwe menshi. Afite amateka akomeye muri Vatican, azwiho ubuhanga, imiyoborere y’imiryango mpuzamahanga, ndetse n’impamvuwe z’ubutabera n’ubwiyunge.
Cardinal Fridolin Ambongo (DR Congo): Arkiyepiskopi wa Kinshasa, afite imvugo ikomeye ku burenganzira bwa muntu n’iyobokamana riharanira amahoro. Ni umwe mu banyafurika bazwi cyane mu rwego mpuzamahanga.
