Izamuka ry’igiciro cy’umugati rigiye kugira uruhare rukomeye mu ihirikwa ry’ubutegetsi

Mu gihe gufata ubutegetsi ahenshi bikorwa hifashishijwe imbaraga za gisirikare nko kugaba ibitero cyangwa coup d Etat, muri Sudani ibyumweru bigiye kurenga bibiri ubutegetsi buriho buhanganye n’abaturage bigaragambya kubera izamuka ry’igiciro cy’umugati byatumye basaba perezida Omar Al- Bashir kwegura .

Ikinyamakuru lemonade.fr kivuga ko muri iyi myigaragambyo hamaze kugwamo abaturage basaga 20 kandi ko igiciro cy’umugati cyikubye inshuro eshatu mu minsi mike ishize, aho cyavuye kuri livre 1 kugera kuri 3, amafranga akoreshwa muri icyi gihugu.

Urebye neza iyi si impamvu nyiri zina kuko byose byatangiye kuzamba kuva aho ubukungu bwicyi gihugu buguye bityo ibiciro muri rusange birazamuka kugeza kuri 70%. Ubukungu bwa Sudani bwaguye kuva aho itakarije igice cy’ubutaka bwacyo bwabaye igihugu cyigenga ( Sudani y Epfo) cyari gikungahaye kuri peteroli. Hakiyongeraho n’ibihano mu rwego rw’ubukungu iki gihugu cyafatiwe kubera imiyoborere bivugwa itari myiza, ihohotera ry’ikiremwamuntu, ibyaha by’intambara no kutubahiriza uburenganzira bwa muntu n’ibindi.

Igiciro cy’umugati rero nubwo gifite shingiro ariko byaba imbarutso kuko byose bishingiye ku bibazo by’ubukungu bihari bimaze igihe biri muri iki gihugu. Imyigaragambyo imaze gufata indi ntera uko bwije uko bukeye, ndetse ikibazo kikaba kimaze guhindurwa politiki kugeza ubwo bimaze kurenga ubutegetsi kuko abigaragambya babikorera mu migi myinshi y’iki gihugu, mu murwa mukuru ho Khattoom abigaragambya bakaba bagera no ku ngoro y’umukuru w’igihugu akoreramo.

Polisi ntako itagira ngo ihoshe abigaragambya ikoresheje ibyuka biryana mu maso n’amasasu nyayo ariko bikaba ibyubusa. Perezida Omar Al- Bashir, aherutse kuganira n’abashinzwe umutekano ababwira ko bagomba kudakoresha imbaraga z’umurengera bahangana n’abaturage.

Umukuru w’igihugu cya Sudani agiye kumara imyaka 30 ari kubutegetsi yagiyeho mubryo bwa coup d’Etat mu 1989, yagiye atorwa n’amajwi ari hejuru cyane, kandi yahinduye itegekonshinga mbere ryashyiragaho imyaka uyobora igihugu atagomba kurenza. Abo baturage baherukaga kumutora muri 2015, ni nabo ubu bifuza ko yegura bamuziza umugati.

Ese aho nka Jenerali, umusirikare wifatiye igihugu yiyushye akuya yaba azemera kumanika amaboko akarekura ubutegetsi? Yaba se azagirana ibiganiro n’abamurwanya? Ese amahanga yo uburyo ahonda agatoki ku kandi aho ntiyaba abonye icyuho? Ibi bibazo nibaza hamwe n’ibindi byinshi uko iminsi iza byose bizasobanuka.

Yewe iby’iyi si ni gatebe gatoki, kubona ushobora kuva kubutegetsi uzize umugati! Abasomyi icyo bakwiriye kumenya nuko batafata umugati nkikintu cyoroshye kuko mu bihugu by’abarabu ari indyo ihabwa agaciro cyane kuko utabura ku meza.

Ni nk’umufaransa udashobora kurya adafashe akarahuri ka vino. Cyangwa uko umunyarwanda aha agaciro amata. Biranyibutsa umurundi umwe wigeze kumbwira ngo haje umuperezida wazamura ibiciro bya Amstel na Ciment yarara avuyeho!

Sudani rero igeze mu bibazo bikomeye biganisha ahatari heza. Twizere ko bizakemuka mu mahoro kuko nta kibazo kitagira igisubizo, abategetsi bagomba kumenyera ko ikwirukankana kenshi ikakumara ubwoba, umuturage wababaye cyane akwiyahuraho kandi wamusobanurira nta kumve kuko inda ishonje itumva, itagira amatwi, iri n’isomo rikwiriye ku bayobora n’abategetsi!