Amakuru aturuka ku mbuga y’urugamba mu burasirazuba bwa Repubulika Iharanira Demokarasi ya Congo aravuga ko gufatwa kwa centre ya Nyanzale, byaviriyemo guhunga kw’ingabo za SADC zari Goma mu murwa mukuru w’intara ya Kivu y’Amajyaruguru.
Ingabo za SADC zigizwe n’iza Afrika y’Epfo, Malawi na Tanzania. Izi ngabo zageze mu Burasirazuba bwa RDC mu mpera z’umwaka ushize, ku masezerano yo kuza gufasha igisirikare cya Repubulika Iharanira Demokarasi ya Congo kurwanya M23.
Ingabo za SADC zari Goma zahunze zerekeza i Bukavu mu murwa mukuru w’intara ya Kivu y’Amajyepfo, aho zari zimaze gushyamirana na bamwe mu basirikare ba FARDC baherereye muri ibyo bice byo mu Burasirazuba bwa Repubulika ya demokarasi ya Congo.
Amakuru avuga ko nyuma y’uko centre ya Nyanzale yo muri teritware ya Rutsuru, mu ntara ya Kivu y’Amajyaruguru ifashwe na M23 ku wa Kabiri w’iki cyumweru turimo, habaye ukutavuga rumwe hagati y’ingabo za Sadc n’igisirikare cya FARDC.
Aya makuru avuga ko ubuyobozi bwa FARDC bushinja SADC kuba ntacyo bukora mu kugira ngo barwanye M23 idakomeza kwigarurira ibindi bice.
Ibi byaviriyemo ingabo za SADC zari Goma zihunga muri uyu mujyi zikizwa n’amaguru zerekeza iya Bukavu zikoresheje inzira y’amazi, aho abarwanyi ba SADC binjiye mu mato ku munsi w’ejo hashize bagana i Bukavu.
Ibyo bibaye mu gihe M23 ikomeje kwigarurira ibice byinshi byo muri teritware ya Masisi, Rutsuru ndetse na Nyiragongo.
Si ingabo za SADC bivugwa ko zahunze zonyine, hubwo haravugwa ko n’abacanshuro nabo bakomeje guhunga, bikavugwa ko baba baragabanyirijwe umushahara, aho Guverinoma ya Repubulika Iharanira Demokarasi ya Congo ibashinja gutererana ku rugamba Wazalendo na FARDC mu ntambara barimo na M23.
