Umutwe wa M23 wibumbiye mu Ihurirro ry’Impuzamashyaka ryiswe Alliance Fleuve Congo AFC, wamaganiye kure iperereza ry’Ubushinjacyaha bukuru ku rupfu rwa Okende bwagaragaje ko yiyahuye bemeza ko ibikomeje gukorwa ari ukumwica bwa kabiri.
Chérubin Okende yabaye minisitiri wo gutwara abantu n’ibintu muri Congo akanaba umudepite muri icyo gihugu yapfuye ku wa 13 Nyakanga 2023, umurambo we wasanzwe mu modoka ye imbere y’urukiko rukuru i Kinshasa.
Byabanje gutangazwa ko yaba yiyahuye ariko kubera ko yari umwe mu batavuga rumwe n’ubutegetsi bwa Kinshasa buyoborwa na Felix Tshisekedi biba ngombwa ko igitutu cy’abemezaga ko yaba yishwe gituma hatangizwa iperereza kugira ngo hamenyekane icyamwishe cyane ko aho yasanzwe byagaragaraga ko yarashwe amasasu menshi akinavirirana.
Ibyavuye mu iperereza ryakozwe n’Ubushinjacyaha bwa DRC kuri urwo rupfu byashyizwe ahagaragara ku wa 29 Gashyantare 2024 byerekana ko uyu munyepolitiki ngo “Yiyahuye”, ibintu byazamuye amarangamutima y’abatari bake bemeza ko iryo perereza rigamije guhishira amabi yakozwe n’ubutegetsi bwa Perezida Tshisekedi.
Willy Ngoma uvugira AFC/M23 mu bya gisirikare yanditse ku rukuta rwe rwa X agira ati” Ubutabera bwa Okende bwarahonyowe. Iyo abaturage bahonyowe n’abayobozi babo kubera ubufatanyacyaha bw’abacamanza, ingabo ni zo ziha abaturage umudendezo wabo.”
AFC/M23 nayo nk’ihuriro banditse itangazo rigira icyo rivuga ku byavuye muri iryo perereza ry’Ubushinjacyaha aho ririmo ingingo zivuga ko iki cyemezo cyafashwe n’Umushinjacyaha , ari igisebo ku banye-Kongo ndetse no ko ngo “Igihugu cyose cyaguye mu kantu.”
AFC banditse ngo “Iki cyemezo ni igitutsi ku baturage b’Abanyekongo ndetse CHERUBIN Okende yishwe ubwa kabiri.”
Itangazo rya AFC rigaragaza ko ibyerekana uruhare rw’ubutegetsi mu rupfu rwa Okende birimo kuba baramumaranye amezi 7 atarashyingurwa, kuba barabujije umugore we gusohoka igihugu, kuba baranze ko abo mu muryango we ndetse n’inshuti bamusezera bwa nyuma mbere y’uko ashyingurwa n’ibindi.”
AFC-M23 nk’umutwe uharanira uburenganzira bwa muntu muri Congo, bamaganye ikibi cyose ubuyobozi bwa Tshisekedi bukora bityo ko biteguye gusubiza Abanyekongo uburenganzira bwabo.
Umuryango wa nyakwigendera Okende nawo wamaganye ibyavuye mu iperereza ryagaragaje ko uyu mugabo yiyahuye.
Umuryango we uvuga ko biteye isoni binatangaje kuba umunyapolitiki watanze byose kuri Leta ya Congo ashobora kwicwa ariko hakagaragazwa ko yiyahuye. Bakavuga ko bamaganye ibinyoma by’ikinamico Leta yateguye ibinyujije ku mushinjacyaha mukuru witwa Mvonde Mambu.
Me Laurent Onyemba, umwe mu bunganira umuryango wa Okende nawe yavuze ko bitumvikana ukuntu umuntu basanze yapfuye, umurambo we wuzuye amasasu mu modoka ye yaba yari yahuye.
