Kuri uyu wa Gatanu, tariki ya 05 Mata 2024, habaye imirwano ikaze hagati y’igisirikare cya FARDC n’ihuriro ry’ingabo zirwana ku ruhande rwa Guverinoma ya Repubulika Iharanira Demokarasi ya Congo n’Ingabo za M23 ziyobowe na Gen Sultan Makenga.
Ni imirwano yabereye mu duce duherereye ku misozi ya Kitolu, ho muri Localité ya Kibirizi, Cheferie ya Bwito, muri teritware ya Rutshuru, mu Ntara ya Kivu y’Amajyaruguru.
Iyi mirwano yumvikanyemo imbunda ziremereye n’izito, nk’uko amakuru aturuka ku mirongo y’imbere ku rugamba rwabereye muri ibyo bice abivuga.
Aya makuru avuga ko ingabo za Repubulika Iharanira Demokarasi ya Congo n’abazishyigikiye mu kurwanya M23 aribo bagabye ibitero mu birindiro by’Intare za Sarambwe biri muri ibyo bice byo muri Localité ya Kibirizi.
Mu makuru yizewe yatanzwe n’abaturage baturiye ibyo bice bavuga ko M23 yasubije ibyo bitero inyuma ndetse ibasha no kwambura ihuriro ry’Ingabo zirwana ku ruhande rwa RDC imbunda zirimo n’iziremereye, ikaba kandi yabohoje n’aka gace ka Kitolu.
Kuba ingabo za FARDC n’abambari bazo bagabye ibitero simusiga kuri M3 bataye intwaro ziremereye, ndetse n’abasivili benshi bakaba bakomeje kwicwa bunyamaswa na ziriya ngabo za Guverinoma, bituma benshi bibaza ku hazaza h’ubutegetsi bwa Perezida Tshisekedi.
Inzego zishinzwe umutekano mu gihugu ziyobowe ahanini mu buryo bw’icyenewabo no gukurikira inyungu, aho kuba uburyo bwo kurinda abaturage.
Abasirikare bari ku rugamba binubira guhembwa intica ntikize, rimwe na rimwe ntibahabwe n’urupfumuye kuko izo “Cash” ziribwa n’abayobozi babo, inzara nayo iri mu bituma batisunika imbere.
Poropaganda y’ubutegetsi bwa Tshisekedi yemeje Isi ko idashobora gutsindwa kubera Abacanshuro benshi, drones nshya, indege z’Abarusiya n’ibindi binyoma nabyo byakubise igihwereye.
Abasirikare benshi ba RDC boherezwa kurwanira muri Kivu ya Ruguru, ntibahazi na busa, abenshi iyo bashwiragijwe na M23, bihisha mu mazu y’abaturage.
Abo basirikare bagorwa no kuyoboza ngo bahungire kuri MONUSCO kuko baba bavuga Igifaransa n’Ilingala gusa.
Akenshi abo baturuka mu Ntara za kure ya Kivu ya Ruguru, usanga bitotomba, bamwe banga kurwana bavuga ko atari imiryango yabo bitangira.
Ibi byiyongeraho ko izi ngabo zifite amahugurwa macye zishorwa ku ruhembe rw’intambara nk’uko bigenda kuri Wazalendo ndetse biroroshye kubatatanya no kubaca intege.
FARDC izongwa kandi no kurashishwa imbunda zikoreshwa na ba mudahusha, indege zitagira abapilote, imbunda nini n’into baba bambuwe na M23, biri mu bica intege abasirikare.
Ni mu gihe ku mirongo y’urugamba, Ingabo z’u Burundi zoherejwe kuri “Deal” ya Perezida Ndayishimiye na Tshisekedi, zititeguye gupfira Congo, bamwe bafashwe mpiri abandi bishyikiriza M23, hari n’abanze kurwana burizwa indege bajya gufungirwa i Bujumbura.
Hagati aho abasirikare ba SADC bari muri RDC baraca amarenga yo kwikura mu mirwano kubera ubuzima bubi, bavuga ko kubona ibyo kurya ari ingume n’izindi nzitwazo zituma ngo batisukira M23.
Kuva bagera muri iki gihugu kandi nta rugamba na rumwe baratsinda, ibintu bashobora kuzarambirwa bakazinga utwangushye bakisubirira aho baturutse.
Kwiruka kw’ingabo zirwana ku ruhande rwa Leta, biha M23 igihe cyo kwitegura neza, kubaka ubwirinzi, guhagarara neza ahantu hayifasha kurasa neza nko mu duce dutuma utega umwanzi igico ndetse no gusubiza inyuma ibitero igabweho.
Biha kandi amahirwe M23 yo gusunikira kure FARDC n’abambari bayo bakareka kuyitera icyugazi hafi y’ibirindiro byayo mu bice byose yigaruriye.
Ibikorwa byo guhiga abavuga Ikinyarwanda hirya no hino muri RDC, bashinjwa kuba abanzi b’igihugu nabyo biha imbaraga zidasanzwe M23.
Ibi bikorwa bituma bamwe mu basirikare bakuru muri FARDC b’aba-Rwandophones, bakora uko bashoboye bakihuza na M23.
Imvugo z’urwango zibasiye aba-Rwandophones muri politiki ya Congo, nazo ni intandaro yo gucika intege kw’abasirikare by’umwihariko abaturuka mu moko akoresha Ikinyarwanda.
Kuri iyi ngingo, Perezida Tshisekedi aherutse kubwira ikinyamakuru Le Monde ko hari abagambanyi mu Gisirikare cya FARDC.
Yagize ati ” Mu ngabo zacu harimo abahemu. Ntabwo ari ari abavuga Ikinyarwanda gusa, hari n’Abanyekongo bavuga izindi ndimi.”
Uyu mu Perezida yahaye umugisha isubizwaho ry’igihano cy’urupfu, ngo k’uko hari abasirikare bakuru bagambaniye Igihugu banga guhangana n’umwanzi, abandi baregwa guha amakuru M23 no gukorana n’u Rwanda.
