Abarundi bahungiye mu nkambi ya Nyarugusu muri Tanzaniya baraye babwiwe ko basigaranye amezi 10 yonyine ngo babe bavuye kubutaka bwa Tanzaniya
Ni nyuma y’aho usanzwe agenzura impunzi mu karere ka Kigoma John Walioba asuye izo mpunzi maze akazibwira ko uyu ari umwanzuro wafashwe babyumvikanyeho na Leta y’u Burundi mu mwaka ushize wa 2023 ko impunzi zose zigomba gusubizwa iwabo mu Burundi.
John walioba yagize ati: “Mwebwe mufite iwanyu. Igihe cyo gusubira iwanyu cyageze. Amezi 10 gusa niyo musigaranye kuko amezi abiri amaze kurangira. Ndabasabye nitonze, igihe cyo gusubira iwanyu kirageze kugira ngo urwo rubyiruko rubashe kubona uburezi buboneye.”
Yakomeje agira ati: “Nicyo gituma mbabwiye ko igihe cyageze bityo nkaba nizeye ko mugiye kwiyandikisha ku bwinshi kugira ngo musubizwe mu gihugu cyanyu mu byubahiro byanyu.”
“Nimutegereza ko icyo gihe kirangira ibishobora kuzakurikiraho ntimubimbaze. Tanzaniya irabakunda ishaka gukorana n’u Burundi ariko ntishaka impunzi z’abarundi ku butaka bwayo. Ntihagire ubabeshya iki ni icyemezo cyafatiwe hamwe na Leta y’u Burundi, Tanzaniya na HCR.”
Nta gihe cyari gishize Leta ya Tanzaniya yibukije impunzi z’abarundi ziri mu nkambi ya Nduta ko nazo zihawe igihe kitarenze ukwezi k’Ukwakira kugirango zose zose zibe zasubijwe mu Burundi.
Leta ya Tanzaniya yagiye ishinja impunzi z’abarundi bahungiye muri kiriya gihugu kuba aribo bateza umutekano muke mu nkambi barimo .
Ubusanzwe amategeko mpuzamahanga agenga impunzi ku isi avuga ko nta mpunzi yemerewe gucyurwa ku gahato atariyo yonyine ibyisabiye. Byumbikane ko Leta ya Tanzaniya iramutse ikoze iryo kosa yaba irenze ku mategeko mpuzamahanga agenga impunzi ku isi.
