Imirwano yakomeje hagati y’ingabo za Repubulika Iharanira Demokarasi ya Congo, zishyigikiwe na wazalendo, Ingabo z’u Burundi, SADC, MONUSCO na FDLR mu rugamba bahanganyemo na M23 ikomeje gufata uduce twinshi.
Iyi mirwano ikomeye yakomereje ku muhanda wa Rwindi-Kanyabayonga kuri uyu wa gatatu tariki ya 3 Mata 2024.
Muri ako gace hari guturika ibisasu by’intwaro ziremereye n’izoroheje.
Bibaye mu gihe ku wa kabiri, Minisitiri w’intebe mushya wa Congo Judith Tuluka yagize ati: “Abanzi bacu bagomba kumenya ko amaherezo tuzatsinda.”
Amakuru aravuga ko M23 yafashe abasirikare batandatu bo muri Africa y’epfo ku rugamba ahitwa Gasengesi.
Aba basirikare boherejwe na SADC muri Operasiyo yo kurwanya M23 yitwa SAMIDRC ariko amakuru aravuga ko batamerewe neza ku rugamba.
Igisirikare cya Afurika y’Epfo, SANDF, cyahakanye amakuru yavugaga ko abasirikare bacyo bafashwe mpiri na M23 muri Repubulika Iharanira Demokarasi ya Congo.
Ikinyamakuru National Security News kuri uyu wa 2 Mata 2024 cyatangaje ko mu cyumweru gishize, abasirikare ba Afurika y’Epfo bahuriye n’uruva gusenya ku rugamba ubwo bagabaga igitero kuri M23.
Muri uko gutsindwa urugamba ngo ni bwo abasirikare benshi b’iki gihugu baba barishyikirije M23, bagirwa imfungwa z’intambara.
Kiti “Muri iki cyumweru ibibazo ku iyoherezwa rya SANDF mu Burasirazuba bwa RDC byariyongereye cyane. Yaratakaje cyane ubwo yagabaga igitero kuri M23. Muri iyi mirwano, bivugwa ko bamwe mu basirikare ba Afurika y’Epfo bishyiriye M23, bagirwa imfungwa hamwe n’abandi ba Malawi.”
Umuvugizi wa SANDF, Siphiwe Dlamini, kuri uyu wa 3 Mata 2024 yatangaje ko “nta basirikare babiri” b’igisirikare cyabo bishyiriye M23″.
Abasirikare ba Afurika y’Epfo barenga 2000 boherejwe mu butumwa bw’umuryango w’akarere ka Afurika y’amajyepfo muri RDC kuva mu Ukuboza 2023, kugira ngo bafashe iki gihugu kurwanya M23.
Ntabwo ingabo z’iki gihugu zahiriwe muri Congo kuko mu minsi ishize abasirikare bacyo babiri biciwe i Goma, mu gihe no ku rugamba igisirikare cya Congo n’abafatanyabikorwa bacyo bananiwe gushyigura M23.
