Yamenyekanye mu mazina ya Kazarama ariko ubusanzwe ni Colonel Kanyamuhanda Vianny, uyu mugabo wabitswe kenshi ko yapfuye, yanyomoje aya makuru avuga ko ubuzima bwe ari bwiza cyane ndetse ko n’imirimo ye y’iterambere irimbanije.
Uyu mugabo Kazarama yamamaye cyane kuri iri zina hagati ya 2010 na 2013. Kuri ubu rero hari hamaze iminsi hacaracara amakuru y’urupfurwe mu bitangazamakuru bitandukanye byo muri RDC, bivuga ko uyu mugabo wahoze ari umuvugizi wa M23 mu mwaka wa 2013 na mbere yaho ko yapfuye.
Amakuru y’urupfurwe, byavugwaga ko yaguye mu mirwano yari ihanganishije M23 n’ihuriro ry’ingabo zirwana ku uruhande rwa Guverinoma ya Repubulika iharanira demokarasi ya Congo.
Vianney Kazarama yanyomoje aya makuru avuga ko ahari kandi ko atakiba muri uwo mutwe wa M23. Gusa avuga ko agishyigikiye umutwe wa M23 yanabereye umuvugizi.
Yagize ati: « Numvise amakuru avuga ko Colonel Kazarama yaguye mu rugamba rwa bereye muri Karuba hafi na Mushaki, ndagira ngo nyomoze ayo makuru kuko ndi muzima nta bicurane ndwaye ndi mu bikorwa byanjye by’iterambere. »
Yakomeje avuga ko muri iki gihe nyuma yuko avuye muri M23 kuri ubu yibereye mu bikorwa biteza imbere urugo rwe; ndetse kandi yaboneyeho umwanya wo kwihanganisha abarimo kubura ababo muntambara ikomeje guhuza M23 n’ihuriro ry’ingabo za leta ya Repubulika Iharanira Demokarasi ya Kongo, aho yatunze urutoki cyane ku baturage baheruka gupfira muri Mweso no mu nkengero zaho nyuma y’uko bagabweho ibisasu n’Ingabo za SADC na FARDC.
