Ku nshuro ya mbere, Guverinoma y’igihugu cya Roumanie cyo ku mugabane w’u Burayi yatangaje ko babiri mu bahoze ari abasirikare bayo baheruka kwicirwa muri Repubulika Iharanira Demokarasi ya Congo, abandi barakomereka.
Aba bakaba ari abafashaga igisirikare cya Repubulika Iharanira Demokarasi ya Congo n’ihuriro ry’ingabo zirwana ku ruhande rwa FARDC kurwanya M23.
Byatangajwe na Minisiteri y’Ububanyi n’Amahanga y’iki gihugu yavuze ko usibye abapfuye, hari na bane bakomeretse, ndetse umwe muri bo akaba arembye cyane ku buryo ashobora gupfa vuba.
Guverinoma ya Roumanie ntiyigeze isobanura uburyo abo baturage bayo bishwemo, gusa ikinyamakuru romaniajournal.ro cyatangaje ko aba basirikare bari baroherejwe muri RDC mu rwego rwo gutoza Ingabo z’iki gihugu.
Aba bishwe na M23 ubwo muri iki cyumweru yari ihanganiye umujyi wa Sake n’Ingabo za Repubulika Iharanira Demokarasi ya Congo.
Ni imirwano kandi bivugwa ko FARDC batakarijemo ingabo nyinshi yabereye muri uyu mujyi wo muri Teritwari ya Masisi.
M23 imaze igihe ivuga ko ihuriro ry’ingabo za Guverinoma ya Repubulika Iharanira Demokarasi ya Congo bahanganye ririmo abacancuro b’abanya-Burayi.
Amakuru aturuka ku mirongo y’imbere ku rugamba M23 ihanganyemo n’ihuriro ry’ingabo zirwana ku ruhande rwa Repubulika Iharanira Demokarasi ya Congo, avuga ko imodoka za gisirikare za FARDC zari zirimo Abacancuro bari bigize intwari z’urugamba zarashweho urufaya na M23.
Ibi byabaye mu gitondo cyo ku wa kabiri tariki ya 13 Gashyantare 2024 aho bariya bacancuro bari bigize intwari z’urugamba bakaniyita ba-comando kabuhariwe mu barwana ku ruhande rwa FARDC batezwe igico na M23 bakaraswaho urufaya rw’amasasu.
Aya makuru coridorreport.com yabashije kubona avuga ko abacancuro batatu bahasize ubuzima, aho babiri bahise bagwa aho ako kanya abandi bapfira munzira ajyanwe kwa muganga.
Amakuru dukura ku mirongo y’imbere ku rugamba avuga ko M23 yari yatewe n’ihuriro ry’ingabo zirwana ku ruhande rwa Repubulika Iharanira Demokarasi ya Congo zateye ziturutse impande zose.
Ni mu mirwano yabereye mubice bikikije Sake, ikaba yasize Intare za Sarambwe zirwanyeho zitangira kurasa ku bari baziteye baturutse mu mpande zose.
Ubwo M23 yari yagabweho ibitero n’ihuriro ry’ingabo zirwana ku ruhande rwa Repubulika Iharanira Demokarasi ya Congo, izindi ngabo zose (SADC, FARDC, FDLR, Wazalendo, n’ingabo z’u Burundi) zayabangiye ingata ziriruka.
Nyuma yuko ziriya ngabo zibonye zitakwihanganira umuriro w’amasasu ya M23 zikayabangira ingata, abasirikare b’abacancuro bahise bafata iya mbere maze bakomeza kurasana na M23, mu mirwano yasize batatu muri bo bahasize ubuzima.
Ibi byabereye ahitwa Kingi nko muri kilometero 15 uvuye mu mujyi wa Sake, aho izi modoka zarasiwe na M23.
Nyuma yo guhabwa amabwiriza y’urugamba yaturutse ibukuru, abarwanyi ba M23 bahise barasana n’abacancuro maze bivugana batatu muri bo, aho babiri baguye ku irasaniro, undi umwe ashiramo umwuka ubwo yari ari kwitabwaho n’abaganga.
M23 guhera kuri SADC, FARDC, FDLR, Mai Mai, Abarundi bose bariruka! Mukwiruka abacancuro bati mwigireyo tubereke uko barasa! Bahita bajya imbere ngo bahangane na M23!
Aba barwanyi barwana ku truhande rwa FARDC bakaba bakwiye imishwaro bajyanye n’imodoka za gisirikare zariho imbunda hejuru n’amasasu menshi cyane.
Ni nyuma yuko izindi modoka zari zatwitswe na M23 abacancuro babiri bahita bapfa ako kanya, abandi benshi barakomereka, undi apfa ajya kwa muganga. Aba bacancuro bakomeretse bakaba bari kuvurwa na MONUSCO.
Romaniajournal.ro ivuga ko byibura abacancuro b’abanya-Roumanie babarirwa muri 20 bamaze kwicirwa muri RDC kuva muri 2022, ubwo ababarirwa mu magana bajyagayo mu rwego rwo guha ubufasha Ingabo za kiriya gihugu.
Televiziyo yitwa ProTV yatangaje ko abanya-Roumanie babarirwa muri 900 ari bo bari muri RDC, ndetse iki gihugu kikaba gihemba buri umwe $5,000 ku kwezi.
Umuvugizi wa Guverinoma ya Roumanie yatangaje ko iki gihugu ku ruhande rwayo ntaho gihuriye na bariya bacancuro bari muri RDC, keretse ku byerekeye ubujyanama.
