Mu mugi wa Sake muri Teritwari ya Masisi haravugwa umusirikare wa FARDC waturikanywe n’igisasu, kikamukomeretsa tariki ya 14 Gashyantare 2024.
Ni mugihe uyu mugi wa Sake umaze igihe ukorerwamo imirwano ikomeye ya FARDC n’inyeshyamba za M23; bijyanye no kuba buri ruhande rushaka kwigarurira uriya mujyi.
Sosiyete Sivile yo muri Masisi yatangaje ko mu masaha y’umugoroba wo ku wa Gatatu imirwano yarimo ijya mbere mu duce dukikije agace ka Shasha, nyuma y’indi yari yiriwe ibera ahitwa Bweramana muri Groupement ya Mufuni Shanga.
Ariko rero kugeza ubu haracyari urujijo rw’urimo agenzura umujyi wa Sake, bijyanye no kuba buri ruhande mu zihanganye rwigamba kuba rugenzura uriya mujyi.
