Ambasaderi mushya w’u Rwanda muri Kenya, Bwana Ernest Rwamucyo, yashyikirije Nyakubahwa Perezida wa Repubulika ya Kenya, Dr. William Samoei Ruto, impapuro zimwemerera guhagararira u Rwanda muri icyo gihugu (Letters of Credence), mu muhango wabereye muri State House i Nairobi.
Muri uwo muhango w’icyubahiro, Ambasaderi Rwamucyo yagaragaje icyifuzo gikomeye cyo gukomeza gushimangira umubano mwiza n’ubufatanye bw’amateka hagati ya Kenya n’u Rwanda.
Yavuze ko azaharanira guteza imbere ubufatanye mu nzego zitandukanye zirimo ubucuruzi, uburezi, ubukerarugendo, n’umutekano.
Ambasaderi Rwamucyo Ati: “Niyemeje gukora ibishoboka byose kugira ngo urufunguzo rw’ubufatanye ruri hagati y’ibihugu byombi rukomeze kwihutisha iterambere n’imibanire myiza y’abaturage bacu.”
Kenya ni kimwe mu bihugu bifite umubano wihariye n’u Rwanda muri Afurika y’Iburasirazuba, aho impande zombi zisangiye amahame nk’umuryango umwe muri EAC (East African Community).
Uyu mubano ukomeje kugaragazwa n’ubufatanye mu mishinga ihuriweho, imihahirane, n’ingendo zoroshye hagati y’abaturage b’ibihugu byombi.
Ambasaderi Rwamucyo ni umwe mu banyapolitiki n’abadipolomate bafite uburambe, ndetse yigeze no guhagararira u Rwanda mu bindi bihugu by’i Burayi. Izi nshingano nshya zizamwemerera gukomeza gusigasira inyungu z’u Rwanda muri Kenya no mu karere muri rusange.
Ambasaderi Ernest Rwamucyo asimbuye kuri izi nshingano Ambasaderi Martin Ngoga, wari umaze igihe ahagarariye u Rwanda muri Kenya.
Ambasaderi Ngoga yagaragaye mu bikorwa by’indashyikirwa mu guteza imbere umubano w’ibihugu byombi, by’umwihariko mu guteza imbere ubucuruzi, ishoramari n’imikoranire mu rwego rwa dipolomasi.
Mu gihe yari ku murimo, Ambasaderi Ngoga yashyize imbaraga mu gusigasira inyungu z’u Rwanda mu Karere ka Afurika y’Iburasirazuba, ashyira imbere ubufatanye bwubakiye ku bumwe, umutekano n’iterambere. Isimburwa rye na Ambasaderi Rwamucyo ribaye igice gishya mu rugendo rwo gukomeza kubaka umubano ukomeye hagati ya Kigali na Nairobi.
U Rwanda na Kenya bikomeje kwiyemeza gukomeza gukorana bya hafi, mu nyungu z’abaturage babyo n’akarere kose.
