Kuri uyu wa Mbere tariki 12 Gashyantare 2024, abapolisi benshi bashyizwe imbere ya Ambasade ya Leta zunze ubumwe z’Amerika muri Repubulika Iharanira Demokarasi ya Congo kugira ngo bitambike abigaragambya imbere y’iyi ambasade.
Iki cyemezo cyafashwe nyuma y’imyigaragambyo yaciye ibintu mu mujyi wa Kinshasa usanzwe ari umurwa mukuru wa Repubulika ya Demokarasi ya Congo.
Ni nyuma yuko Imiryango myinshi itegamiye kuri leta muri iki gihugu yasabye ko habaho imyigaragambyo yamagana guceceka n’ubufatanyacyaha kw’ibihugu bimwe na bimwe by’iburengerazuba mu bwicanyi ivuga ko bukorerwa Abanye-Congo mu burasirazuba bw’igihugu bukorwa na M23.
Kuri ubu abigaragambyaga batwitse amapine mu mujyi wa Kinshasa, mu rwego rwo kwamagana icyo bita guceceka k’Umuryango Mpuzamahanga mu bwicanyi bukorerwa Abanyekongo.
Mu nkuru yatangajwe na Corridorreport.com, nuko uyu munsi amashuri menshi ya za ambasade i Kinshasa, yafunze imiryango kuri uyu Mbere.
Ni nyuma yo guhamagarira rubanda kwigaragambya bamagana Umuryango Mpuzamahanga bashinja kutagira icyo ukora mu kurangiza intambara yo mu burasirazuba binyuze ku rugamba rw’amasasu.
Icyemezo cyo gushyira uburinzi budasanzwe kuri ambasade cyaje nyuma y’aho Guverinoma ya Repubulika Iharanira Demokarasi ya Congo yokejwe igitutu n’amahanga kubera iyi myigaragambyo yibasiye kuwa Gatandatu ushize abakozi ba MONUSCO ndetse n’ibikoresho bya yo birimo imodoka zatwitswe n’abigaragambyaga i Kinshasa.
