Ingabo za Repubulika Iharanira Demokarasi ya Congo ziheruka koherezwa mu Bibogobogo, nyuma y’uko ku wa kabiri habaye imirwano ikomeye mu gace ka Mulima hagati y’umutwe wa Twirwanaho n’ihuriro ry’Ingabo za FARDC, iz’u Burundi, hamwe n’imitwe ya Wazalendo na FDLR. Iyi mirwano yatumye izi ngabo zihunga zivuye mu bigo byazo, zigahungira mu kigo kigenzurwa na Colonel Ntagawa Rubaba kiri mu muhana wa Bibogobogo, ariko nyuma zimwe muri zo zoherejwe i Baraka.
Mu cyumweru gishize, abasirikare benshi ba FARDC batumwe mu Bibogobogo, baturutse i Rulimba, Uvira, n’ahandi. Bamwe muri bo bari bahunze imirwano yabereye mu Minembwe ubwo Twirwanaho yahafataga ku wa 21 Gashyantare 2025.
Amakuru aturuka mu Bibogobogo avuga ko aba basirikare bakihagera bashyizeho ibigo bya gisirikare bishya, harimo kimwe kiri mu gace ka Ugeafi hafi y’umuhana wa Magaja, ikindi gishyirwa mu Rulimba, kimwe na Kavumu. Hari kandi ikindi kigo cyari gisanzwe kiri mu Bibogobogo centre, kigenzurwa na Colonel Ntagawa Rubaba.
Iyi koherezwa kw’aba basirikare bivugwa ko yari igamije gukumira ko umujyi wa Baraka wafatwa n’umutwe wa M23 cyangwa Twirwanaho. Ibi byakurikiye uko abarwanyi b’iyo mitwe baheruka kugera ari benshi mu Minembwe, baturutse i Bukavu, bayobowe na Brigadier General Charles Sematama, uzwi ku izina rya Intare-Batinya.
Ku wa kabiri tariki ya 1 Mata 2025, ihuriro ry’Ingabo za Congo ryagabye ibitero mu nkengero za komine ya Minembwe, biturutse mu bice bya Lusuku, Point Zero, Mukera no kwa Mulima. Umutwe wa Twirwanaho wagaragaje uko wihagazeho binyuze mu nyandiko washyize kuri X, aho wemeje ko wihagazeho mu mirwano, ndetse ugafata bimwe mu bice ibi bitero byaturukagamo, nubwo nyuma wariyongeye gusubira inyuma.
Aya makuru yemezwa n’umunyamakuru bwite wa ityazo.com aho avuga ko, mu gihe iyi mirwano yabaga mu Rusuku no kwa Mulima, ingabo zari mu Bibogobogo zahungiye mu kigo kigenzurwa na Colonel Ntagawa Rubaba kiri muri Bibogobogo centre. Iki gikorwa cyafashwe nk’icyerekana ihahamuka ry’izi ngabo, kuko zimwe muri zo zari zaramaze guhura n’imirwano ikomeye yahuje FARDC na Twirwanaho mu Minembwe, ndetse hakaba n’izo iheruka kwihanganisha n’intambara ya M23 i Bukavu.
Umwe mu batuye mu Bibogobogo yagize ati: “Ntituzi icyabaye ku basirikare ba Leta bari hano. Twabonye bigenda bava mu bigo byabo, bagahungira mu kigo cya Col. Ntagawa. Biragaragara ko bahungabanye kubera imirwano ikomeje kubera mu Rusuku no kwa Mulima.”
Nubwo bimeze gutyo, ahagana nimugoroba wo ku wa kabiri, Colonel Karateka wari ushinzwe ikigo kiri mu gace ka Ugeafi yamanutse i Baraka ari kumwe n’abasirikare be bose. Biravugwa ko yari ahamagajwe igitaraganya kugira ngo ajye gutanga ubufasha mu mirwano yo kwa Mulima no mu Rusuku. Gusa, ntiharamenyekana niba koko yatanze uwo musada, ikizwi ni uko yageze i Baraka nyuma yo guhamagarwa byihuse.
