Mu cyumweru gishize, Teritwari ya Fizi yo mu Ntara ya Kivu y’Amajyepfo yongeye kuba isibaniro rikomeye ry’imirwano hagati ya Twirwaneho n’ingabo z’u Burundi ziri ku butaka bwa Repubulika Iharanira Demokarasi ya Congo (RDC).
Amakuru aturuka ku mirongo y’imbere ku mbuga y’urugamba no mu nzego z’umutekano yemeza ko abasirikare benshi b’u Burundi baguye muri iyi mirwano yabaye ku wa Kabiri, tariki ya 15 Mata 2025.
Uyu mutwe wa Twirwaneho, ugizwe n’abarwanyi b’Abanyamulenge, bivugwa ko wagabye igitero gikomeye ku ngabo z’u Burundi zari zinjiye mu gace ka Fizi bambaye imyenda ya gisivile.
Aba basirikare, bamwe muri bo barimo abo mu rwego rw’ubutasi bwa gisirikare (G2) ndetse n’abo mu ngabo zidasanzwe zizwi nka Unité des Opérations Spéciales (UOS), bari baje mu bikorwa byihariye byo guhiga imitwe yitwaje intwaro irwanya ubutegetsi bwa Congo, barimo M23 na Twirwaneho.
Inkuru zivuga ko aba basirikare binjiye banyuze ku mwigimbakirwa wa Ubwari, uherereye mu kiyaga cya Tanganyika, aho bakoresheje amato mu buryo bw’ibanga.
Nyamara, urugendo rwabo rwaje kurangira nabi ubwo bageraga mu duce two hejuru ya Minembwe na Fizi, aho bagabweho igitero cyihuse na Twirwaneho, bivugwa ko bari bazi neza amakuru y’urugendo rw’aba basirikare.
Nubwo umubare nyawo w’abapfuye utaramenyekana neza, ibimenyetso by’imbere mu gisirikare cy’u Burundi bivuga ko byibura abasirikare 18 bahasize ubuzima.
Hari amakuru avuga ko hari n’abandi benshi bakomerekejwe bikomeye ndetse hakaba hari bamwe mu basirikare bataye ubuzima mu kiyaga cya Tanganyika ubwo ubwato bwari bubatwaye bwakoraga impanuka ku wa Gatanu, nyuma y’imirwano.
Abandi basirikare baburiwe irengero bikekwa ko bafashwe mpiri na Twirwaneho.
Umwe mu bahoze ari mu nzego z’iperereza muri ako gace yabwiye umunyamakuru wacu ati: “Ubu buryo bw’ingabo z’u Burundi bwo kwinjira mu gihugu bambaye gisivile bumaze gutahurwa na Twirwaneho na M23.”
“Biragaragara ko bateguwe neza kandi bafite ubushishozi buhagije bwo guhagarika ibikorwa by’amayeri bya gisirikare.”
U Burundi ni kimwe mu bihugu bifite ingabo zoherejwe muri Congo mu rwego rwo gushyigikira Leta ya Kinshasa mu ntambara ihanganyemo na M23, Twirwaneho, Mai-Mai n’indi mitwe.
Ni ihuriro ry’ingabo ryubatswe ku bufatanye bwa Afurika y’Iburasirazuba (EAC), aho u Burundi bwemeye kohereza ibihumbi by’ingabo mu butumwa bwo kugarura amahoro.
Gusa, igikomeje kwibazwaho ni uburyo izi ngabo zoherezwa muri ibi bikorwa by’iperereza n’imirwano ya bucece, bitangajwe ko kenshi zishobora kuba ziri mu bikorwa binyuranye n’amategeko mpuzamahanga n’amasezerano y’ubufatanye.
Aka karere ka Fizi n’uburasirazuba bwa Congo muri rusange kakomeje kuba indiri y’imvururu n’intambara zimaze imyaka irenga 20.
Uretse M23 ikomeje kurwana mu Burasirazuba bwa Repubulika Iharanira Demokarasi ya Congo, Twirwaneho na yo ikomeje kwigarurira ibice byo muri Kivu y’Amajyepfo, by’umwihariko aho batuye — mu bice bya Minembwe, Itombwe na Uvira.
Kugeza ubu, ntacyo Leta y’i Bujumbura iratangaza ku buryo bweruye ku byabaye. Ariko mu minsi yashize, abayobozi b’ingabo z’u Burundi bagaragaje ko hari ibibazo by’ubushake buke ku ruhande rwa EAC Force mu kurandura inyeshyamba zafashe ibice bya Congo.
