Nyuma y’urupfu rutunguranye rwa Lieutenant Général Sikatenda Shabani wapfiriye muri kasho afungiwe mu buryo budasobanutse, amahanga n’imiryango iharanira uburenganzira bwa muntu basabye Guverinoma ya RDC gutangiza iperereza ryihuse, ryigenga kandi rinyuze mu mucyo.
Mu itangazo ryashyizwe ahagaragara n’Umuryango w’Abibumbye binyuze ku Biro byawo bishinzwe uburenganzira bwa muntu (OHCHR), hagaragaramo amagambo akakaye: “Gufunga umuntu igihe kirenga umwaka nta rubanza, bikarangira apfiriye muri kasho, bigaragaza ikibazo gikomeye mu mikorere y’ubutabera. Leta ya RDC ifite inshingano zo gusobanura uko byagenze, no kurenganura ababuze ababo.”
Amnesty International na yo yavuze ko ari ishusho y’ubutegetsi bukomeje kuniga ubwisanzure.
Umuryango Amnesty International, usanzwe ukurikirana isura y’uburenganzira bwa muntu muri Afurika yo hagati, nawo wasohoye itangazo rigira riti: “Urupfu rwa Sikatenda si urwa mbere, ahubwo ni igice cy’urugamba rurerure rwo gukumira abatavuga rumwe n’ubutegetsi. Guverinoma igomba gusobanura impamvu y’ifungwa rinyuranyije n’amategeko ry’uyu musirikare, ndetse n’uko yapfiriye mu maboko yayo.”
Uwo muryango usaba ko hakorwa iperereza ritandukanye n’iry’inzego za Leta, rishingiye ku bwigenge, rikagaragaza uruhare rw’abantu cyangwa inzego zaba zaragize uruhare mu rupfu rwe.
Ku rundi ruhande, Umuryango w’Ubumwe bwa Afurika (AU) nawo wagaragaje impungenge ku buryo ubutegetsi bwa RDC buri kugenda bugaragaraho ibikorwa byo gucecekesha abahoze mu nzego z’umutekano batakigirana icyizere n’ubuyobozi buriho.
Mu butumwa bwatanzwe n’Intumwa idasanzwe ya AU muri Congo, habayeho kwihanganisha umuryango wa Sikatenda no gusaba ko “habaho igikorwa kirambye cyo kurinda uburenganzira bw’abantu bose, cyane cyane abahoze mu nzego za Leta.”
Mu mijyi itandukanye irimo Lubumbashi, Goma na Bukavu, abaturage bagaragaje akababaro kenshi ndetse banasaba ko urupfu rwa Gen Sikatenda rudakwiriye gusigara ari “inkuru ya politiki itagira igisubizo.”
Hari abakoze imyigaragambyo y’amahoro basaba ubutabera, abandi bashyira indabo ku marembo ya kasho yapfiriyemo, bavuga ko ari “intwari yibagiranye.”
Kugeza ubu, ibiro bya Perezida Félix Tshisekedi ntibiragira icyo bitangaza ku bijyanye n’urupfu rwa Gen Sikatenda.
Icyakora bamwe mu banyapolitiki bari hafi y’ubutegetsi batangiye kuvuga ko “nta ruhare rw’ubutegetsi ruri mu rupfu rwe”, ibyo abatavuga rumwe n’iyo mvugo bita “gupfukirana ukuri hakiri kare.”
