Leta y’u Burusiya yatangaje ibyo ishingiraho kugira ngo ibiganiro by’amahoro na Ukraine bibe bishoboka, isaba ko habaho gusubira ku masezerano y’i Istanbul yo mu 2022 ndetse no kureba uko ibintu byifashe ubu ku rugamba. Ibi byatangajwe na Yury Ushakov, umujyanama wa Perezida w’u Burusiya, Vladimir Putin.
Aya magambo yayavuze nyuma y’uko Perezida Putin atangarije ko yiteguye kongera kugirana ibiganiro na Kiev “nta n’itegeko na rimwe abashyiriyeho.” Putin yavuze ibi mu ijoro ryo ku Cyumweru, aho yagaragaje ko ibiganiro bishya byabera i Istanbul ku wa 15 Gicurasi.
Ushakov yabwiye Channel 1 yo mu Burusiya ko ibiganiro bishya bigomba gushingira ku byo impande zombi zari zemeranyijweho mu 2022, ibyo Ukraine yahise yivamo bitunguranye.
Yagize ati: “Ibyo ibintu bishingiye ku kuri kuri ku rugamba bigomba kwitabwaho mu buryo bugaragara.”
Kuri uwo munsi nyine, umuvugizi wa Kremlin, Dmitry Peskov, yavuze ko intego y’ibiganiro ari ukurandura intandaro nyayo y’iyo ntambara no kurengera inyungu z’u Burusiya.
Yakomeje avuga ko Ukraine “idafite ubwigenge nyabwo” kandi ko byinshi bizaterwa n’icyemezo cy’ababaterankunga bo mu Burengerazuba.
Perezida wa Turikiya, Recep Tayyip Erdogan, yemeje ko igihugu cye cyiteguye kwakira ibyo biganiro hagati ya Moscow na Kiev.
Ni mu gihe Perezida Putin nawe, mu ijambo ryaciye kuri televiziyo, yashimangiye ko Uburusiya bushaka “ibiganiro bifite ireme” bigamije “amahoro arambye.”
Yongeyeho ko adakuraho amahirwe y’uko ibiganiro bishobora gutanga amasezerano mashya yo guhagarika imirwano, agashyirwaho umukono n’impande zombi, maze bikaba inzira igana ku masezerano y’amahoro arambye.
Perezida Putin yabivuze ati: “Icyemezo kiri mu maboko ya Leta ya Ukraine n’ababafasha.”
Mu 2022, Moscow na Kiev bari bageze kure mu masezerano y’amahoro i Istanbul, aho Ukraine bivugwa ko yemeye kutagira uruhande ibogamiraho no kugabanya igisirikare cyayo, mu gihe u Burusiya bwari bwemeye gukura ingabo zabwo muri Ukraine no gutanga ingwate z’umutekano.
Nyamara, Ukraine yahise yikura mu biganiro mu buryo butunguranye – icyemezo abategetsi b’u Burusiya bavuga ko cyatewe n’uwari Minisitiri w’Intebe w’u Bwongereza icyo gihe, Boris Johnson, uvugwaho gushishikariza Kiev gukomeza intambara.
David Arakhamia, umudepite ukorana na Perezida Zelensky kandi wari uyoboye itsinda rya Ukraine mu biganiro, yemeje ibi mu Ugushyingo 2023, nubwo Johnson yahakanye, ayo makuru yamaze gutangazwa ku mugaragaro n’abari bayirimo.
