Mu gitero gikomeye cyagabwe ku wa Gatanu tariki ya 12 Mata, abasirikare b’igisirikare cy’u Burundi, Forces de Défense Nationale du Burundi (FDNB), barashinjwa kwinjira ku butaka bwa Repubulika Iharanira Demokarasi ya Congo bagasagarira abaturage b’Abanyamulenge bari mu rugendo rwo gusubira mu byaro by’iwabo mu gace ka Rugezi, mu misozi ya Kivu y’Epfo.
Abatangabuhamya b’inyangamugayo bari aho byabereye, hamwe n’ibimenyetso bifatika byabonetse ku butaka, barahamya ko iki gitero cyari cyateguwe neza kandi gishingiye ku mugambi wa gisirikare.
Ibikoresho by’itumanaho bya gisirikare, intwaro ziriho ibirango by’igisirikare cy’u Burundi, na radiyo za gisirikare byasanzwe aho imirwano yabereye.
Uru rugomo rwasize abasirikare 12 b’Abarundi bahasize ubuzima, nk’uko bitangazwa n’abaturage n’amakuru yatanzwe n’abashinzwe umutekano.
Ntiharamenyekana neza umubare w’abaturage b’Abanyamulenge bishwe cyangwa bakomerekejwe, ariko amakuru yemeza ko harimo impfu n’abakomeretse bikomeye.
Nubwo Abarundi basanzwe bashinjwa ibikorwa byo kwinjira muri Kivu y’Epfo bambaye imyambaro y’imitwe yitwaje intwaro nka Maï-Maï cyangwa FARDC, kuri iyi nshuro, binjiye bambaye imyambaro ya gisirikare isanzwe, bitandukanye n’uko byajyaga bikorwa mu ibanga.
Byateye impungenge abasesenguzi ndetse n’abaturage b’i Rugezi, bibaza impamvu u Burundi bwafashe icyemezo cyo kwigaragaza ku mugaragaro muri ibyo bikorwa.
Abanyamulenge, ubwoko bw’Abatutsi b’Abanye-Congo, bamaze imyaka bibasirwa mu misozi ya Kivu y’Epfo.
Imidugudu yabo yarasenywe, amatungo yabo aranyagwa, naho benshi ubu babaye impunzi imbere mu gihugu ndetse no hanze y’igihugu.
Mu gihe bamwe muri bo bagerageje gusubira mu byabo, nk’i Rugezi, bahura n’urugomo ruteye inkeke, rukunze kwirengagizwa n’amahanga.
Imiryango iharanira uburenganzira bwa muntu ikomeje gusaba ko habaho iperereza ryigenga kandi ryihuse kuri ibyo bikorwa.
Mu ijambo aherutse gutanga, Perezida w’u Burundi yahakanye ko ikibazo gikomoka ku moko, avuga ko Abanyamulenge atari Abatutsi, ahubwo ari Abanye-Congo basanzwe.
Ariko bamwe mu basesenguzi n’abadipolomate babona iri jambo nk’uburyo bwo guhisha ubwicanyi bushingiye ku moko no gupfobya ibimenyetso bigaragaza ibikorwa bishobora gufatwa nk’ibya jenoside.
Leta ya Congo kugeza ubu ntiyigeze igira icyo itangaza ku gitero cyabereye i Rugezi. Ibi bikomeje gufatwa n’ababikurikiranira hafi nk’uburangare cyangwa kwanga gusenya umubano wa dipolomasi n’u Burundi, ariko bikaba bishyira mu kaga abaturage bayo.
Naho amahanga, cyane cyane Umuryango w’Abibumbye n’Umuryango wa Afurika Yunze Ubumwe, ntacyo baratangaza kuri iki kibazo gikomeje gufata indi ntera.
Imiryango irengera uburenganzira bwa muntu irasaba ko habaho igikorwa mpuzamahanga cyo kurengera Abanyamulenge, ndetse hakajyaho uburyo bw’uburinzi bwihutirwa.
Barasaba ko amahanga atarebera gusa, ahubwo ahagurukira guhagarika uru rugomo ruhoraho, ruvugwa nk’urugamije guhanagura icyiciro runaka cy’abantu ku butaka bwa Congo.
Imana irabareba abarenganya abandi