Mu gihugu cy’u Burundi, Leta yatangaje ko Amadini yose n’Amatorero yose ari mu gihugu ajyiye kujya atanga umusoro muri Leta ndetse impano zose yakiriye zivuye hanze zikamenyekanishwa.
Mu itangazo ryasohowe n’ibiro bya Minisitiri w’Ubutegetsi bw’igihugu rivuga ko Amadini yose n’Amatorero agomba kujya asorera inkunga zose zivuye hanze ndetse n’impano z’amafaranga yakirwa avuye mu bihugu byo hanze.
Minisiteri y’ubutegetsi bw’igihugu cy’u Burundi yasohoye iri tangazo tariki ya 1 Nzeri 2024, ndetse yemeza ko ibi bizatangira gukurikizwa tariki ya 16 Nzeri 2024.
Itangazo rigira riti “Guhera tariki 16 Nzeri 2024, amadini n’amatorero akorera mu Burundi, impano bakira ziba ziturutse hanze bazajya bajya kuzimenyekanisha muri Minisiteri y’Ubutegetsi bw’Igihugu hamwe n’inkunga z’amafaranga bakira na yo, hagomba kuzajya habaho amasezerano y’umufatanyikorwa n’Itorero afashije ndetse azajya anyuzwa muri BRB.”
