Ku munsi w’ejo hashize tariki ya 24 Kanama 2024, mu gihugu cya Tanzania hatangiwe isomo rya ruhago, aho ikipe ya Yanga Africans yo muri iki gihugu yatsinze Vital’o yo mu Burundi ibitego 6-0.
Mu mukino ubanza iyi kipe ya Yanga nabwo ntiyari yagiriye imbabazi iyi kipe yo mu baturanyi, kuko nabwo yari yayitsinze ibitego 4-0, ubwo aggregate yabaye ibitego 10-0.
Ni bimwe bavuga ngo urwishigishiye ararusoma, kuko ikipe ya Vital’o yahisemo kujya kwakirira Yanga Africans i Dar Salaam, kandi wenda iyo iyakirira iwabo byari kuyiha agahenge. Bivuze ko imikino yose, ubanza n’uwo kwishyura yabereye i Dar Salaam.
Muri uyu mukino wo kwishyura, ibitego bya Yanga byatsinzwe na Zouzoua, Mzize, Chama, Dube, Aziz Ki, Yahya. Mu gihe Vital’o yo yabonye ikarita y’umutuku ku munota wa 13 ya Amedee Ndavyutse, maze imvura y’ibitego itangira ubwo.
Ubwo uyu mukino wasozwaga, ikipe ya Yanga Yakiriye million 30 Tsh zivuye ku mukuru w’igihugu, bivuze ko ari million 5 kuri buri gitego, nkuko buri kipe yo muri Tanzania igiye mu mikino Nyafurika iyahabwa iyo itsinze. Bivuze ko Vital’o ihesheje Yanga million 50Tsh.
Uyu ni umukino wa CAF Champions League wahuzaga aya makipe. Mu y’indi mikino, ikipe ya Apr Fc nayo yatsindaga Azam Fc ibitego 2-1 muri Aggregate, naho CBE yo muri Ethiopia yasezereye SC Villa kuri 3-2 muri Aggregate.
Kuri ubu iyi kipe ya Yanga Africans izakina na CBE yo muri Ethiopia, izatsinda izahita ibona tike yo mu matsinda. Naho Apr Fc izakina na Pyramid Fc yo mu gihugu cya Misiri, izatsinda nayo izabona tike yo mu matsinda. 
