Kuri uyu wa 8 Kanama 2024 hasakaye inkuru y’inshamugongo yuko uwahoze ari Perezida w’ishyirahamwe ry’umupira w’amaguru muri Africa (CAF) yitabye Imana.
Uyu munya-Cameroun Issa Hayatou yabaye Perezida wa CAF hagati ya 1998 na 2017, nyuma yaje kuvaho asimburwa n’Umunya-Madagascar Ahmad Ahmad mu 2017.
Uyu mugabo w’imyaka 77 y’amavuko yapfuye habura umunsi umwe gusa ngo yizihize isabukuru ye y’amavuko yo kuzuza imyaka 78, yari kuyuzuza kuri uyu wa Gatanu tariki ya 9 Kanama 2024.
Issa Hayatou yaguye mu gihugu cy’u Bufaransa mu mujyi wa Paris, aho yapfuye azize uburwayi.
Ubwo uyu mugabo yari ayoboye CAF, Leta ye yagize uruhare mu kuzamura umupira wa Africa ku rwego ruri hejuru gusa Leta ye igashinjwa gukoresha amafaranga nabi, ruswa, ndetse n’akarengane mu gutanga amasoko amwe n’amwe.
Uyu mugabo nyuma yo kuva ku buyobozi bwa CAF yahise aba Perezida w’Inama y’Ubuyobozi ya ANAFOOT muri Cameroun.
Uyu mugabo kandi azakomeza yibukwe nk’umwe mu bagize uruhare rukomeye mu izamuka ry’umupira wa Africa.
